‘ఫ్యామిలీ డాక్టర్‌’ సన్నాహక ఏర్పాట్లపై సమీక్ష

మాట్లాడుతున్న ఆరోగ్య, కుటుంబ సంక్షేమశాఖ కమిషనర్‌ జె.నివాస్‌ చిత్రంలో జేసీ శ్యామ్‌ప్రసాద్‌, డీఎంహెచ్‌వో శోభారాణి తదితరులు

చిలకలూరిపేట గ్రామీణ, న్యూస్‌టుడే: రాష్ట్రవ్యాప్తంగా ఏప్రిల్‌ 6 నుంచి ఫ్యామిలీ డాక్టర్‌ పథకం సీఎం చేతులమీదుగా ప్రారంభించనున్న నేపథ్యంలో సన్నాహక ఏర్పాట్లపై ఆరోగ్య, కుటుంబ సంక్షేమశాఖ కమిషనర్‌ జె.నివాస్‌ జేసీ శ్యామ్‌ప్రసాద్‌తో కలసి పల్నాడు జిల్లా చిలకలూరిపేట మండలం లింగంగుంట్ల వైఎస్సార్‌ క్లినిక్‌లో బుధవారం సమీక్షించారు. రాష్ట్రవ్యాప్తంగా ఈ పథకం కోసం 104 వాహనాలు 260 ఇప్పటికే ప్రారంభించిన నేపథ్యంలో వాటి ద్వారా అందుతున్న సేవలు తదితర అంశాలపై పలు సూచనలు చేశారు. ఇప్పటికే ఉమ్మడి కృష్ణా, గుంటూరు జిల్లాల్లో ఈ కార్యక్రమం పైలెట్‌ ప్రాజెక్టుగా నిర్వహిస్తున్నారు. ఐసీడీఎస్‌, సచివాలయం, వైద్య, ఆరోగ్యశాఖ అధికారులు, సిబ్బందితో పలు అంశాలపై చర్చించారు. సమావేశంలో ఫ్యామిలీ డాక్టర్‌ కాన్సెప్ట్‌ నోడల్‌ అధికారి డాక్టర్‌ రమేష్‌, జాయింట్‌ డైరెక్టర్లు డాక్టర్‌ అనిల్‌, డాక్టర్‌ హనుమంతరావు, డాక్టర్‌ అర్జునరావు, డాక్టర్‌ గ్లోరీ, డీఎంహెచ్‌వో శోభారాణి, తహసీల్దార్‌ సుజాత, పీహెచ్‌సీ వైద్యులు రాజేష్‌, ఐసీడీఎస్‌ పీడీ ఇందిర, డీఆర్‌డీఏ పీడీ బాలునాయక్‌, ఐసీడీఎస్‌ సూపర్‌వైజర్లు, వైద్య, ఆరోగ్యశాఖ సిబ్బంది తదితరులు పాల్గొన్నారు.