ప్రైవేటు ఉద్యోగి బలవన్మరణం

మాచర్ల గ్రామీణ, న్యూస్‌టుడే: హైదరాబాద్‌లో విధులు నిర్వహిస్తున్న ఓ  ప్రైవేటు కంపెనీ ఉద్యోగి బలవన్మరణానికి పాల్పడ్డారు. బంధువుల కథనం మేరకు వివరాలిలా ఉన్నాయి. ప్రకాశం జిల్లా కొమరోలు మండలంలోని బాదినేనిపల్లెకు చెందిన జోగిపర్తి మల్లికార్జున (35) భార్య శ్రీవాణి, ఇద్దరు కుమారులతో హైదరాబాద్‌లోని మియాపూర్‌లో ఉంటున్నారు. అక్కడి ఓ ప్రముఖ కంపెనీలో ఉద్యోగం చేస్తున్నారు. గత ఆదివారం ఇంటి నుంచి వెళ్లిన మల్లికార్జున ఆచూకీ లేకపోవడంతో బంధువులు, కుటుంబ సభ్యులు గాలింపు చేపట్టారు. ఈ నేపథ్యంలో బుధవారం పల్నాడు జిల్లా మాచర్ల మండలం విజయపురిసౌత్‌ పోలీసుస్టేషన్‌ పరిధిలోని సాగర్‌ చెక్‌పోస్టు సమీపంలో ఓ చెట్టుకు మృతదేహం వేలాడుతుండగా, గుర్తించిన స్థానికులు పోలీసులకు సమాచారమందించారు. వారు వచ్చి పరిశీలించి బాదినేనిపల్లెకు చెందిన మల్లికార్జునగా గుర్తించారు. అనంతరం మియాపూర్‌లోని బాధిత కుటుంబ సభ్యులకు తెలిపారు. మృతికి గల కారణాలు తెలియరాలేదు.