‘రాష్ట్రంలో దళితుల ప్రాణాలకు రక్షణ ఏదీ?’

తెదేపా ఎస్సీ సెల్‌ నాయకుల నిరసన

పట్టాభిపురం, న్యూస్‌టుడే: రాష్ట్రంలో దళితుల ప్రాణాలకు రక్షణ లేకుండా పోయిందని తెదేపా రాష్ట్ర ఎస్సీ సెల్‌ ఉపాధ్యక్షుడు గుడిమెట్ల దయారత్నం విమర్శించారు. వైకాపా గూండాలు దళిత మహిళను ట్రాక్టర్‌తో తొక్కించి దారుణంగా హత్య చేసిన నిందితులను తక్షణమే శిక్షించాలని డిమాండ్‌ చేస్తూ లాడ్జి సెంటర్‌లో బుధవారం నిరసన ప్రదర్శన నిర్వహించారు. వైకాపా ప్రభుత్వానికి వ్యతిరేకంగా నినాదాలు చేశారు. దయారత్నం మాట్లాడుతూ తెదేపా దళిత కార్యకర్త సుధాకర్‌ భార్య హనుమాయమ్మను వైకాపా నాయకుడు కొండలరావు ట్రాక్టర్‌తో తొక్కించి హత్య చేయడం జగన్‌ రెడ్డి రాక్షస పాలనకు నిదర్శనం. రాష్ట్రంలో రాజారెడ్డి రాజ్యాంగం నడుస్తుంది. దళితులపై నిత్యం రాష్ట్రంలో ఏదో ఒక ప్రాంతంలో దాడులు జరుగుతూనే ఉన్నాయి. దళితుల ఓట్లతో గద్దెనెక్కి వారి పైనే దాడులు చేయిస్తున్నారు. కొండలరావును అరెస్టు చేసి కఠినంగా శిక్షించాలని డిమాండ్‌ చేశారు. రూ.కోటి పరిహారం ఇవ్వాలన్నారు. కార్యక్రమంలో తెదేపా ఎస్సీ సెల్‌ నాయకులు బొల్లెద్దు సుశీలరావు, దాసరి రమణ, సౌపాటి రత్నం, లింగంగుంట్ల ఆదాం, దర్ననపు యాకోబు, అనిల్‌కుమార్‌, ఆనంద్‌, రమేష్‌ తదితరులు పాల్గొన్నారు.