TS News: నా చావుకు వారే కారణం

● సెల్ఫీ వీడియో తీసుకుని ఆత్మహత్య

● మృతుడు తొషీబా కంపెనీ కార్మికుడు

సంగారెడ్డి అర్బన్‌, న్యూస్‌టుడే: ‘నన్ను మానసికంగా తీవ్రంగా వేధిస్తున్నారు. నేను తప్పులు చేయకున్నా చేసినట్లుగా పని గట్టుకుని వేధిస్తున్నా సూపర్‌వైజర్లు రాజేశ్‌, సంపత్‌, కొండల్‌రెడ్డి నా చావుకు కారణం’ అంటూ సెల్ఫీ వీడియో తీసుకుని పురుగు మందు తాగి ఆత్మహత్య చేసుకున్న ఘటన సంగారెడ్డి గ్రామీణ స్టేషన్‌ పరిధిలో కుల్పగూర్‌ శివారులో సోమవారం చోటు చేసుకుంది. కుటుంబీకులు తెలిపిన వివరాల ప్రకారం.. శాంతినగర్‌ కాలనీకి చెందిన గౌండ్ల ప్రసాద్‌ గౌడ్‌ (31) పటాన్‌చెరు మండలం రుద్రారంలోని తొషీబా పరిశ్రమలో పని చేస్తున్నారు. మరో వ్యక్తి తప్పు చేస్తే శనివారం తనను నిందించారని ఆవేదన వ్యక్తం చేశారు. పురుగు మందు తాగి ప్రాణాలు తీసుకున్నాడు. కుటుంబీకులు వెంటనే సంగారెడ్డి ప్రభుత్వ ఆసుపత్రికి తరలించారు. అప్పటికే మృతి చెందినట్లు వైద్యులు ధ్రువీకరించారు. దీంతో కుటుంబీకులు పట్టణ ఠాణాను ఆశ్రయించారు. అక్కడి పోలీసులు తమ పరిధి కాదని, గ్రామీణ ఠాణా పోలీసులకు సమాచారం ఇచ్చారు. వారు వచ్చి మృతదేహాన్ని పరిశీలించి కుటుంబీకుల నుంచి వివరాలు సేకరించారు. ప్రసాద్‌ గౌడ్‌కు భార్య, ఇద్దరు కుమారులున్నారు. ఘటనకు సంబంధించి ఫిర్యాదు అందలేదని సంగారెడ్డి గ్రామీణ ఎస్‌ఐ కె.సుభాష్‌‘ న్యూస్‌టుడే’ చెప్పారు. సదరు పరిశ్రమ నిర్వాహకుల వద్దకు డీసీసీ అధ్యక్షురాలు నిర్మలారెడ్డి వెళ్లి చర్చలు జరిపారు.