Crime News: వ్యాపారవేత్త శిల్ప అరెస్టు.. పార్టీలిచ్చి ప్రముఖులకు రూ.కోట్లలో కుచ్చుటోపీ!

హైదరాబాద్‌: వ్యాపారంలో పెట్టుబడి పెడితే అధిక లాభాలు ఇస్తానంటూ మోసం చేసిన వ్యాపారవేత్త శిల్పా చౌదరి అనే మహిళ ఆమె భర్త శ్రీనివాస్‌ను నార్సింగి పోలీసులు అరెస్టు చేశారు. రూ.కోటి 5లక్షల రూపాయలు తీసుకొని తిరిగి ఇవ్వలేదని దివ్య అనే మహిళ నార్సింగి పీఎస్‌లో ఫిర్యాదు చేశారు. బాధితురాలి ఫిర్యాదు మేరకు కేసు నమోదు చేసి దర్యాప్తు చేపట్టిన పోలీసులు గండిపేట సిగ్నేచర్‌ విల్లాస్‌లో నివాసం ఉంటున్న శిల్ప, ఆమె భర్తను అదుపులోకి తీసుకొని ప్రశ్నించారు. ఆమె బ్యాంకు ఖాతాలను పరిశీలించారు.

దివ్య నుంచి రూ.కోటిగా పైగా నగదు తీసుకున్నట్లు నిర్ధారించుకున్న పోలీసులు తిరిగి చెల్లించకపోవడంతో శిల్ప, ఆమె భర్తను అరెస్టు చేసి రిమాండ్‌కు తరలించారు. విలాసవంతమైన జీవితానికి అలవాటుపడిన శిల్పా చౌదరి తనను వ్యాపారవేత్తగా పరిచయం చేసుకొని పలువురిని రూ. కోట్లలో మోసం చేసినట్లు పోలీసులు అనుమానిస్తున్నారు. పార్టీలు ఇచ్చి సెలబ్రిటీలను శిల్ప ఆకర్షించినట్లు తెలుస్తోంది.