ఆకలి తీర్చారు.. అద్భుత చర్చి నిర్మించారు

నేడు చార్లెస్‌ వాకర్‌ ఫాస్నెట్‌ జయంతి

మెదక్‌ అర్బన్‌, న్యూస్‌టుడే: మెదక్‌ జిల్లా పేరెత్తగానే వెంటనే గుర్తుకు వచ్చేది మెదక్‌ కెథడ్రల్‌ చర్చి. ఈ అపురూప కట్టడానికి ఉన్న ఘనత, ప్రత్యేకత అలాంటింది. మదిదోచే సమున్నత నిర్మాణ విశేషాలెన్నింటినో కలిగి, చూపరులను మంత్రముగ్ధులను చేసే మెదక్‌ చర్చి సృష్టికర్త ఛార్లెస్‌ వాకర్‌ ఫాస్నెట్‌ జయంతి నేడు.  శతాబ్దం క్రితం తీవ్ర దుర్భిక్ష పరిస్థితులు నెలకొన్న సమయంలో ఆకలిదప్పులతో అల్లాడుతున్న వారిని ఆదుకునే సదుద్దేశం, దేవుడికి సమున్నతమైన మందిరం నిర్మించాలన్న సంకల్పంతో ఆనాడు ఫాస్నెట్‌ ఊరికే కూర్చుండలేదు. ఈ చర్చి నిర్మాణానికి శ్రీకారం చుట్టారు. ఎన్నో ఇబ్బందులకు ఓర్చి నిర్మించిన ఈ చర్చి ఆసియా ఖండంలోనే అతిపెద్దదిగా, ప్రపంచ ప్రఖ్యాతిగాంచి సుందరమైన నిర్మాణంగా వినుతికెక్కింది. కరుణామయుడి కోవెలగా, పేదల పెన్నిధిగా, మెదక్‌ మహా దేవాలయంగా పేరొందింది. చర్చిని సందర్శించేందుకు తెలుగు రాష్ట్రాలతోపాటు పొరుగు రాష్ట్రాల నుంచేకాక విదేశీయులు సైతం తరలివస్తుండటం విశేషం. ఆయన జయంతి పురస్కరించుకుని నేడు చర్చిలో గురువులు, కమిటీ బాధ్యుల ఆధ్వర్యంలో ప్రత్యేక ప్రార్థలు నిర్వహించనున్నారు.