సుద్ద పరిశ్రమలో ప్రమాదం.. యువకుడి మృత్యువాత

సంఘటన స్థలంలో పరిశీలిస్తున్న ఏఎస్సై నారాయణ

పెద్దేముల్‌, న్యూస్‌టుడే: మండలంలోని మారేపల్లి సమీపంలోని ఆగ్రో సుద్ద పరిశ్రమలో ప్రమాదం జరిగి ఓ యువకుడు మృత్యువాత పడ్డాడు. ఇందుకు సంబంధించిన వివరాలను ఏఎస్సై నారాయణ తెలిపారు. రాజస్థాన్‌కు చెందిన ముఖేù్, నవీన్‌, మనోజ్‌సింగ్‌ సుద్ద పరిశ్రమలో పని చేసేందుకు కుదిరారు. సోమవారం ఉదయం సూపర్‌వైజర్‌ ముఖేష్‌ విధులు ముగించుకుని, మరో సూపర్‌వైజర్‌ నవీన్‌కు బాధ్యతలు అప్పగించాడు. జేసీబీని నడిపే డ్రైవర్‌ సమయానికి రాకపోవడంతో పని ఆలస్యం అవుతోందని హెల్పర్‌ మనోజ్‌సింగ్‌ (18)కు స్టార్ట్‌ చేయాలని ఆదేశించాడు. యంత్రానికి సంబంధించిన తాళం లేకపోవడంతో మనోజ్‌సింగ్‌ జేసీబీ కిందికి వెళ్లి తీగలను కలిపి స్టార్ట్‌ చేశాడు. దీంతో యంత్రం ఒక్కసారిగా ముందుకు కదలడంతో, కింది భాగంలో ఉన్న మనోజ్‌సింగ్‌ తలపై నుంచి వెళ్లి అక్కడికక్కడే దుర్మరణం పాలయ్యాడు. నవీన్‌ బాధ్యతారహితంగా వ్యవహరించాడని, చర్యలు తీసుకోవాలని కోరుతూ ముఖేష్‌ పోలీసులకు ఫిర్యాదు చేశాడు. కేసు నమోదు చేసుకుని దర్యాప్తు జరుపుతున్నామని ఏఎస్సై తెలిపారు.