శిల్పాచౌదరి కస్టడీకి కోర్టులో మళ్లీ పిటిషన్‌

ఈనాడు, హైదరాబాద్‌: పెట్టుబడుల పేరిట కోట్లాది రూపాయలు తీసుకుని మోసం చేసిన ఆభియోగాలు ఎదుర్కొంటున్న గండిపేటకు చెందిన శిల్పాచౌదరిని మరో ఐదు రోజుల కస్టడీకి కోరుతూ సోమవారం ఉప్పర్‌పల్లి న్యాయస్థానంలో పోలీసులు పిటిషన్‌ దాఖలు చేశారు. ఈ నెల 4, 5 తేదీల్లో న్యాయస్థానం అనుమతితో నిందితురాలిని విచారించారు. విచారణలో సేకరించిన సమాచారం, నిందితుల కాల్‌డేటా ఆధారంగా పోలీసులు పలువురికి నోటీసులు జారీ చేశారు. సోమవారం విచారణకు రావాల్సిందిగా పేర్కొన్నారు. ఆధారాలు ఇస్తారని భావించిన పోలీసులకు బాధితులు ఊహించని ఝలక్‌ ఇచ్చారు. వారంతా ముఖం చాటేయటంతో మరోసారి తాఖీదులు జారీ చేయాలనుకుంటున్నారు. సినీ రంగానికి చెందిన ఇద్దరు ప్రముఖులు శిల్ప నిర్వహించిన కిట్టీ పార్టీలో తరచూ పాల్గొనేవారు. వీరు ఓ పోలీసు ఉన్నతాధికారిని కలిసినట్టు తెలిసింది. శిల్పాచౌదరి తాను సేకరించిన సొమ్మును ఇద్దరు స్థిరాస్తి వ్యాపారులకు ఇచ్చినట్టు చెప్పిన విషయం విదితమే.