TS News: తెలంగాణలో రూపాయికి కిలో బియ్యం రద్దు చేస్తారా?: కిషన్‌రెడ్డి

దిల్లీ: తెలంగాణలో ధాన్యం కొనుగోలు చేయట్లేదంటే రూపాయికి కిలో బియ్యం రద్దు చేయడమేనని కేంద్రమంత్రి కిషన్‌రెడ్డి అన్నారు. దిల్లీలో ఏర్పాటు చేసిన మీడియా సమావేశంలో ఆయన మాట్లాడుతూ... రూపాయికి కిలో బియ్యం ఇవ్వాలంటే రాష్ట్రం ధాన్యం సేకరించాల్సిందేనని స్పష్టం చేశారు.  బాయిల్డ్‌ రైస్‌ విషయంలో కేంద్రానికి కొన్ని ఇబ్బందులున్నాయన్నారు. కేంద్రం రా రైసు కొనుగోలు చేస్తుంది... కొనుగోలు చేయం అని ఎప్పుడైనా చెప్పిందా? అని కిషన్‌రెడ్డి ప్రశ్నించారు. తెరాస నేతలు భాజపాపై నిందలు వేయడానికి ప్రయత్నిస్తున్నారని ఆరోపించారు. హుజూరాబాద్‌లో ఓటమి పాలైన తర్వాత నుంచే తెరాస గందరగోళం చేస్తోందన్నారు.