బాలికపై సామూహిక అత్యాచారం

ఆలస్యంగా వెలుగుచూసిన దుర్ఘటన

సుల్తాన్‌బజార్‌, న్యూస్‌టుడే: ఓ బాలికపై అత్యాచారం జరిగిన ఘటన సుల్తాన్‌బజార్‌ పోలీస్‌స్టేషన్‌ పరిధిలో ఆలస్యంగా వెలుగు చూసింది. పోలీసులు, విశ్వసనీయ వర్గాల కథనం ప్రకారం.. కాచిగూడ ప్రాంతానికి చెందిన బాలిక(17) కోఠి ప్రాంతంలోని ఓ కళాశాలలో చదువుతోంది. నవంబరు 30న కళాశాలకని బయలుదేరిన తమ అమ్మాయి తిరిగిరాలేదని సదరు బాలిక తలిదండ్రులు అదే రోజు రాత్రి సుల్తాన్‌బజార్‌ పోలీసులకు ఫిర్యాదు చేశారు. అదృశ్యం కేసు నమోదు చేసి దర్యాప్తు చేపట్టారు. ఈ నెల 4న చాదర్‌ఘాట్‌ వద్ద బాలిక ఆచూకీ లభ్యం కావడంతో అదుపులోకి తీసుకున్నారు. ఓ యువకుడు తనను కోఠిలోని బస్టాప్‌ నుంచి నగర శివారులోకి తీసుకెళ్లి అత్యాచారానికి పాల్పడ్డాడని, మరికొంత మంది కూడా అత్యాచారానికి ఒడిగట్టినట్లు బాలిక పోలీసులకు తెలిపింది. పోక్సో కేసు నమోదు చేసి సుల్తాన్‌బజార్‌ ఏసీపీ దేవేందర్‌ ఆధ్వర్యంలో ప్రత్యేక బృందం ఏర్పాటు చేసి దర్యాప్తు ముమ్మరం చేశారు. ఈ విషయం మంగళవారం ప్రసారమాధ్యమాల్లో వైరల్‌ కావడంతో స్థానికంగా కలకలం రేపింది. ఘటనకు సంబంధించి నలుగురిని అదుపులోకి తీసుకుని విచారిస్తున్నట్లు తెలిసింది.