చెరువులో మునిగి గొర్రెల కాపరి మృతి

రాయికోడ్‌, న్యూస్‌టుడే: ప్రమాదవశాత్తు చెరువులో జారి పడి గొర్రెల కాపరి మృతి చెందిన ఘటన మండలంలోని కుస్నూర్‌లో చోటు చేసుకుంది. ఎస్సై ఏడుకొండలు తెలిపిన వివరాలు.. మండలంలోని కుస్నూర్‌ గ్రామానికి చెందిన గొల్ల మహిపాల్‌(30) రోజు మాదిరిగానే ఈ నెల 7న గొర్రెలు కాసేందుకు వెళ్లారు. కుస్నూర్‌ గ్రామ శివారులోని గుర్మిళ్ల వాగు చెరువులోకి దిగి గొర్రెలను కడుగుతుండగా ప్రమాదవశాత్తు కాలు జారి చెరువులో పడిపోయారు. ఇది గమనించిన అదే గ్రామానికి చెందిన కాపు బస్వరాజ్‌ గ్రామస్థులకు, బాధిత కుటుంబ సభ్యులకు సమాచారం అందించారు. కుటుంబ సభ్యులు చెరువు వద్దకు వెళ్లి చూడగా పూర్తిగా మునిగిపోయి ఉన్నట్లు గమనించారు. పలువురు గ్రామస్థులు చెరువులో వెతికి మహిపాల్‌ మృతదేహాన్ని వెలికితీశారు. మహిపాల్‌ భార్య నిరోష ఫిర్యాదు మేరకు కేసు నమోదు చేసుకుని దర్యాప్తు చేస్తున్నట్లు ఎస్సై వివరించారు.