TS News: పథకం పాత పని మనిషిది.. అమలు కొత్తామెది

అమీర్‌పేట, న్యూస్‌టుడే: సినీ ఫక్కీలో జరిగిన ఓ చోరీని ఎస్సార్‌నగర్‌ పోలీసులు ఒక్కరోజులోనే ఛేదించారు. అమీర్‌పేటలో వ్యాపారి వినోద్‌ పొద్దర్‌ ఇంట్లో భారీ చోరీకి పాల్పడింది గతంలో పని చేసిన పనిమనిషి, ప్రస్తుత పని మనిషేనని గుర్తించారు. వారితోపాటు సహకరించిన ఇద్దరిని అరెస్టుచేశారు. అమీర్‌పేట ధరంకరమ్‌రోడ్డులోని అంజనీటవర్స్‌లో ఫ్యాన్ల వ్యాపారి వినోద్‌ పొద్దర్‌ ఇంట్లో గురువారం చోరీ జరిగింది. ఆ సమయంలో ఇంట్లో పని మనిషి అర్చనను విచారించగా తనపై దొంగలు దాడి చేశారని చెప్పింది. 39 తులాల బంగారు ఆభరణాలు, రూ.5లక్షల నగదు చోరీ అయిందంటూ వినోద్‌ ఫిర్యాదుచేశారు. పనిమనిషి అర్చనను అనుమానించిన పోలీసులు ఆమె ఫోన్‌ పరిశీలించారు. గతంలో ఆ ఇంట్లో పనిచేసి మానేసిన లక్ష్మితోపాటు గణేష్‌ అనే వ్యక్తితో ఎక్కుగా మాట్లాడినట్లు గుర్తించారు. అర్చనను విచారిస్తున్న సమయంలో గణేష్‌ అక్కడి నుంచి మాయమయ్యాడు. దీంతో పోలీసులు లక్ష్మిని తనదైన శైలిలో విచారించారు. సీసీకెమెరాలు పరిశీలించడంతో చోరీ గుట్టు తెలిసింది. చోరీకి పథక రచన చేసిన లక్ష్మి, దాడి జరిగినట్లు నటించిన అర్చన, గణేష్‌, అతని సూచనతో చోరీకి పాల్పడిన మిత్రుడు నవీన్‌లను పోలీసులు అరెస్టు చేశారు. హకీంపేటలో దాచిన చోరీ సొత్తును స్వాధీనం చేసుకున్నారు.