TS News: నాన్నను బతికించండి: చికిత్సకు విరాళాలు సేకరిస్తున్న కుమారులు

చికిత్స పొందుతున్న హనుమాన్‌దాస్‌

ఘట్‌కేసర్‌, న్యూస్‌టుడే: చావుబతుకుల మధ్య ఆసుపత్రిలో ఉన్న తమ తండ్రిని బతికించండి అంటూ ఇద్దరు కుమారులు పడుతున్న వేదన పలువురిని కంటతడి పెట్టిస్తోంది. మేడ్చల్‌ జిల్లా ఘట్‌కేసర్‌ మండలం ఎదులాబాద్‌కు చెందిన ప్రైవేటు ఉపాధ్యాయుడు బత్తుల హనుమాన్‌దాస్‌, నిరంజని(42) పని నిమిత్తం ఈ నెల 24 సాయంత్రం ఘట్‌కేసర్‌ వెళ్లి బైకుపై వస్తున్నారు. సౌత్‌ ఇండియన్‌ బ్యాంకు వద్ద సీవీఎస్‌ఆర్‌ ఇంజినీరింగ్‌ కళాశాల విద్యార్థి మద్యం మత్తులో కారుతో దంపతులను ఢీకొట్టాడు. నిరంజని అక్కడికక్కడే చనిపోయింది. ఆ విద్యార్థిని పోలీసులు రిమాండ్‌కు తరలించారు. హనుమాన్‌దాస్‌ సికింద్రాబాద్‌లోని ఓ ప్రైవేటు ఆసుపత్రిలో చికిత్స పొందుతున్నారు. రోజూ రూ.50 వేలు ఖర్చవుతోందని, మూడు శస్త్రచికిత్సలకు రూ.15 లక్షలు- రూ.25లక్షలు అవుతుందని వైద్యులు చెప్పారని కుమారులు కల్యాణ్‌, మనీష్‌ తెలిపారు. తమకు అంత స్తోమత లేదని, ఆర్థిక సాయం చేయాలని సామాజిక మాధ్యమాల ద్వారా వేడుకుంటున్నారు.