Hyderabad News: 13 నెలలబిల్లులు మాఫీ!

ఉచిత నీటి పథకంలో చేరినా చేరక పోయినా వర్తింపు

ఈనాడు, హైదరాబాద్‌: గ్రేటర్‌ పరిధిలో గృహ నల్లాదారులకు ప్రభుత్వం ఊరటనిచ్చింది. నెలకు 20 వేల లీటర్ల ఉచిత తాగునీటి పథకంలో చేరినా.. చేరకపోయినా గత 13 నెలలకు సంబంధించి నీటి బిల్లులను మాఫీ చేసింది. ఈ మేరకు గురువారం పురపాలక శాఖ జారీ చేసిన మెమోలో స్పష్టం చేశారు. గ్రేటర్‌ వ్యాప్తంగా గృహ నల్లాలకు ఉచిత తాగునీరు వర్తింపజేసే పథకానికి ప్రభుత్వం 2020 డిసెంబరులో శ్రీకారం చుట్టింది. మొత్తం 9,84,023 లబ్ధిదారుల్లో గురువారం నాటికి సుమారు 5 లక్షల మంది నల్లాదారులు అనుసంధానం చేశారు. తాజాగా ప్రకటించిన మాఫీ.. కేవలం ఈ 13 నెలల బిల్లులకు మాత్రమే వర్తిస్తుంది. అది కూడా 20 వేల లీటర్లకు మాత్రమే. అంతకంటే ఎక్కువ వాడుకుంటే ఆ బకాయి బిల్లులు చెల్లించాలి. బకాయిలపై ఎలాంటి వడ్డీ, జరిమానాలు విధించరని ఉత్తర్వుల్లో పేర్కొన్నారు. నూతన సంవత్సరంలో ఇది గ్రేటర్‌ వాసులకు తీపికబురే.ఉచిత పథకంలో చేరని వారికి జనవరి నుంచి తాగునీటి బిల్లులు అందజేస్తారు.