ద్విచక్ర వాహనాలపై యువకుల హల్‌చల్‌

కిందపడి ఒకరికి గాయాలు

విభాగినిని ఢీకొనడంతో ధ్వంసమైన వాహనం

రాజేంద్రనగర్‌, న్యూస్‌టుడే:యువకులు ద్విచక్ర వాహనాలపై హల్‌చల్‌ చేస్తూ అతివేగంగా ప్రయాణిస్తున్న క్రమంలో కింద పడడంతో ఒకరికి తీవ్ర గాయాలైన ఘటన రాజేంద్రనగర్‌ ఠాణా పరిధిలో చోటు చేసుకుంది. సీఐ కనకయ్య వివరాల ప్రకారం మాదాపూర్‌కు చెందిన కృష్ణ కుమారుడు వెంకటసాయి(25) ఆదివారం 11మంది స్నేహితులతో కలిసి ద్విచక్ర వాహనాలపై మెహిదీపట్నం నుంచి జడ్చర్ల వెళ్తున్నారు. రోడ్డుపై అతివేగంగా ప్రయాణించారు. రాజేంద్రనగర్‌ ఠాణా పరిధిలోని వ్యవసాయ విశ్వవిద్యాలయం ముందు ప్రయాణిస్తున్న సమయంలో వెంకటసాయి వాహనం అదుపుతప్పి విభాగినిని ఢీకొట్టింది. అతడికి గాయాలయ్యాయి. స్థానికుల సమాచారంతో పోలీసులు అక్కడికి చేరుకొని ఆసుపత్రికి తరలించారు. యువకులంతా స్పోర్ట్స్‌ వాహనాలతో రైడింగ్‌ చేస్తున్నట్లు గుర్తించారు. ఈ ఘటనపై కేసు నమోదు చేసి దర్యాప్తు చేస్తున్నట్లు సీఐ కనకయ్య వివరించారు.