జీఆర్పీ పోలీసుల స్పందన.. తప్పిన ప్రాణాపాయం

బాలకృష్ణ రెనివాల్‌

రెజిమెంటల్‌బజార్‌, న్యూస్‌టుడే: కుమార్తెను రైలెక్కించి నడుస్తున్న రైలు దిగే ప్రయత్నంలో ప్రమాదవశాత్తు జారి రైలు, ఫుట్‌పాత్‌ల మధ్య ఓ వ్యక్తి పడిపోయాడు. ఈ విషయాన్ని గుర్తించిన వెంటనే స్పందించిన జీఆర్పీ కానిస్టేబుళ్లు రైలును నిలుపడంతో అతడు స్వల్పగాయాలకు గురై ప్రాణాలతో బయటపడ్డాడు. ఈ ఘటన సికింద్రాబాద్‌ రైల్వేస్టేషన్‌లో చోటు చేసుకుంది. వివరాలు జీఆర్పీ పోలీసుల కథనం ప్రకారం.. హైటెక్‌ సిటీలో ఉండే బాలకృష్ణ రెనివాల్‌ తన కుమార్తెను రైలెక్కించేందుకు సికింద్రాబాద్‌ స్టేషన్‌కు వచ్చాడు. సోమవారం సాయంత్రం 6.25గంటలకు స్టేషన్‌లోని ఒకటో ప్లాట్‌ఫాంపై బోగీలో ఆమెను ఎక్కించి రైలు దిగుతున్నాడు. అదే సమయంలో రైలు బయలుదేరడంతో  జారి ప్లాట్‌ఫాం, రైలు మధ్యలో పడిపోయాడు. ప్లాట్‌ఫాంపై ఉన్న జీఆర్పీ హెడ్‌కానిస్టేబుళ్లు డేవిడ్‌రాజ్‌, శ్రీనివాస్‌లు వెంటనే రైలెక్కి చైన్‌లాగి రైలును నిలిపారు. అతడిని బయటకు తీశారు. తలకు స్వల్ప గాయం కావడంతో వెంటనే అతడిని గాంధీ ఆసుపత్రికి తరలించి చికిత్స చేయించారు.