నేటి నుంచి చిత్తారమ్మ జాతర

షాపూర్‌నగర్‌, న్యూస్‌టుడే: గాజులరామారంలోని చిత్తారమ్మ జాతర శుక్రవారం నుంచి ప్రారంభం కానుంది. ఎనిమిది రోజుల పాటు జరిగే ఈ కార్యక్రమంలో మొదటిరోజు ఉదయం 8 గంటలకు గణపతి పూజ, పుణ్యాహవాచనం, పంచగవ్యప్రాశన, దీక్షాధారణ, మంటపారాధన, అగ్నిప్రతిష్ఠాపన తదితర కార్యక్రమాలు ఉంటాయి. కొవిడ్‌ మూడో దశ ఉద్ధృతి సందర్భంగా జాతరకు ఆలయ నిర్వహణ కమిటీ, పోలీసుల ఆధ్వర్యంలో ఆంక్షలు కఠినతరం చేశారు. ఈ నేపథ్యంలో ఆలయ పరిసరాల్లో దుకాణాలకు అనుమతి లేకపోవడంతో సందడి లేకుండాపోయింది. ఆలయ ప్రాంగణంలో మేకలు, కోళ్లు కోయడానికి అనుమతి లేదని అధికారులు పేర్కొన్నారు. ప్రధాన జాతర జరిగే ఆదివారం రోజున నిర్వహించే ఫలహారం బండి ఊరేగింపు, సోమవారం రంగం కార్యక్రమాలు రద్దు చేశారు.