కర్రతో కొట్టి.. రైలు ప్రయాణికుల ఫోన్లు కొట్టేస్తూ

రెజిమెంటల్‌బజార్‌, న్యూస్‌టుడే: రైల్లో డోర్‌ వద్ద ఫోన్‌ మాట్లాడుతున్న ప్రయాణికులను లక్ష్యంగా చేసుకుని పట్టాల పక్కన నిల్చొని కర్రతో కొట్టి కిందపడిన ఫోన్లు తీసుకుని ఉడాయిస్తున్న నిందితుడిని సికింద్రాబాద్‌ జీఆర్పీ పోలీసులు అరెస్ట్‌ చేశారు. ఘట్‌కేసర్‌ ప్రాంతానికి చెందిన కూలీ కంది సతీష్‌(21)   పట్టాల పక్కన నిల్చొని రైలు మూలమలుపుల వద్ద నెమ్మదించగానే డోర్‌ వద్ద ఫోన్‌ మాట్లాడుతున్న ప్రయాణికులను కర్రతో చేతిపై కొట్టేవాడు. ఫోన్‌ కిందపడగానే తీసుకునే ఉడాయించేవాడు. శుక్రవారం ఉదయం సికింద్రాబాద్‌ రైల్వేస్టేషన్‌ అవుటర్‌లోని పట్టాల పక్కన తిరుగుతున్న నిందితుడిని జీఆర్పీ పోలీసులు అదుపులోకి తీసుకున్నారు. అతడి వద్ద నుంచి రెండు సెల్‌ఫోన్లను స్వాధీనం చేసుకుని రిమాండుకు తరలించారు.