భార్య వేధింపులు తాళలేక భర్త ఆత్మహత్య

శ్రావణ్‌కుమార్‌

బాలాపూర్‌, న్యూస్‌టుడే: భార్యతో పాటు వారి కుటుంబీకులు తీవ్రంగా వేధిస్తున్నారని, తన మరణానికి వారే కారణమంటూ ఓ వ్యక్తి లేఖ రాసి ఆత్మహత్య చేసుకున్న సంఘటన మీర్‌పేట ఠాణా పరిధిలో జరిగింది. ఇన్‌స్పెక్టర్‌ మహేందర్‌రెడ్డి వివరాల ప్రకారం... బడంగ్‌పేట లక్ష్మీదుర్గాహిల్స్‌ కాలనీకి చెందిన శ్రీరాముల శ్రావణ్‌కుమార్‌(35) సెలూన్‌ దుకాణంలో పని చేస్తున్నాడు. ఆయనకు జనగాం జిల్లా తరిగొప్పుల గ్రామానికి చెందిన రవళితో రెండేళ్ల క్రితం వివాహమైంది. ఈ దంపతులకు ఒక కుమార్తె. పాప జన్మించిన కొన్ని రోజులకు వారిద్దరి మధ్య గొడవలు ప్రారంభమవడంతో రవళి పుట్టింటికి వెళ్లిపోయింది. ఈ క్రమంలో 20 రోజుల క్రితం రవళి రూ.20 లక్షలు ఇవ్వాలని డిమాండ్‌ చేసింది. దీంతో మనస్తాపం చెందిన శ్రావణ్‌కుమార్‌ గురువారం రాత్రి కాలనీలోని వాటర్‌ ట్యాంక్‌ ఎక్కి దూకి ఆత్మహత్మ చేసుకున్నాడు. పోలీసులు కేసు దర్యాప్తు చేస్తున్నారు