గోదావరిలో దూకి మహిళ ఆత్మహత్య

బాసర, న్యూస్‌టుడే: ఆర్థిక ఇబ్బందులతో ఓ వివాహిత నిర్మల్‌ జిల్లా బాసర వద్ద నదిలో దూకి ఆత్మహత్యకు పాల్పడింది. గోదావరి స్నానఘట్టాల వద్ద నదిలో ఓ మహిళ మృతదేహం తేలియాడుతోందన్న స్థానికుల సమాచారం మేరకు బాసర పోలీసులు ఘటనాస్థలికి వెళ్లి మృతదేహాన్ని వెలికితీయించారు. ఆధారాల కోసం పరిశీలించగా మహిళ చేతిపై మొబైల్‌ నంబరు కనిపించింది. ఆ నంబరుకు పోలీసులు ఫోన్‌ చేయగా ఆమె భర్త మాట్లాడారు. మృతురాలి పేరు సుస్మిత అని, నివాసం హైదరాబాద్‌లోని మల్లాపూర్‌ అని చెప్పారు. ఆత్మహత్య చేసుకున్న విషయం భర్తకు తెలియజేసిన పోలీసులు శవపంచనామా నిర్వహించారు. కేసు నమోదు చేసి దర్యాప్తు చేస్తున్నట్లు బాసర ఎస్సై మహేష్‌ తెలిపారు.