టైరు ఎగిరిపడి కూలీ మృతి

పరిగి గ్రామీణ, న్యూస్‌టుడే: లారీపై నుంచి స్టెప్నీటైరు ద్విచక్ర వాహనంపై పడి కూలీ పనిచేసుకునే ఓ యువకుడు అక్కడికక్కడే మృతి చెందాడు. ఈ ఘటన పరిగి మండల పరిధిలోని రాఘవాపూర్‌ గ్రామ పరిసరాల్లో పరిగి- షాద్‌నగర్‌ రహదారిపై సోమవారం సాయంత్రం జరిగింది. స్థానికులు తెలిపిన వివరాలిలా ఉన్నాయి.. మహబూబ్‌నగర్‌ జిల్లా కోయిల్‌కొండ మండలానికి చెందిన నిఖిల్‌రెడ్డి (21) పరిగినుంచి ద్విచక్ర వాహనంపై వెళ్తున్నాడు. ఎదురుగా (బోరుబావులను తవ్వే పరికరాలను, పైపులను తరలించే) లారీ అతివేగంగా వస్తుండగా..కల్వర్టు దగ్గర అందులో ఉన్న టైరు పైకి ఎగిరి నిఖిల్‌రెడ్డిపై పడటంతో తల పగిలి అతను అక్కడికక్కడే ప్రాణాలు కోల్పోయాడు. టైరు వేగంగా పక్కనున్న వంతెనకు ఢీకొట్టి పొదల్లోకి దూసుకెళ్లిందని, ఈ ప్రమాదం నుంచి తృటిలో తప్పించుకున్నట్లు మరో వాహనదారుడు వివరించాడు. నిర్లక్ష్యంగా వాహనాన్ని నడిపి ఒకరి ప్రాణాలు బలి తీసుకున్న డ్రైవర్‌ లారీతోపాటు పరారయ్యాడు. కేసు నమోదు చేసి దర్యాప్తు చేస్తున్నట్లు పోలీసులు తెలిపారు.