సమర్థంగా ఇంటింటి సర్వే: కలెక్టర్‌

పరిగి: జిల్లాలో జ్వరాలకు సంబంధించిన సర్వేను క్షేత్ర స్థాయిలో సమర్థంగా నిర్వహించేలా అధికారులు చర్యలు తీసుకోవాలని పాలనాధికారిణి నిఖిల సంబంధిత అధికారులను ఆదేశించారు. సోమవారం పరిగి, చిట్యాల గ్రామాల్లో ఆరోగ్య, ఆశ కార్యకర్తలు నిర్వహిస్తున్న ఇంటింటి సర్వేను పరిశీలించారు. ఈ సందర్భంగా మాట్లాడుతూ జ్వరాలతో బాధపడే వారి వివరాలను సేకరించాలన్నారు. మొదటి, రెండో డోసు టీకాలను తీసుకున్నారా అని పలువురిని అడిగి తెలుసుకున్నారు. ప్రజలందరూ విధిగా మాస్కులు ధరించడంతో పాటు భౌతిక దూరం పాటించాలని, టీకా తీసుకోవడం ద్వారానే కరోనా వ్యాప్తిని అరికట్టవచ్చని తెలిపారు. జ్వరంతో బాధపడుతున్న వారికి కొవిడ్‌ పరీక్షలు నిర్వహించి హోం ఐసోలేషన్‌ ఔషధ కిట్లు అందజేయాలని ఆదేశించారు. పాజిటివ్‌ అని తేలినా భయపడాల్సిన పనిలేదని మందులు సక్రమంగా వాడితే తగ్గుతుందని భరోసా కల్పించారు. కార్యక్రమంలో తహసీల్దారు విద్యాసాగర్‌రెడ్డి, మున్సిపల్‌ కమిషనర్‌ ప్రవీణ్‌కుమార్‌, ఛైర్మన్‌ అశోక్‌కుమార్‌, జిల్లా వైద్యాధికారి తుకారంభట్‌ తదితరులు పాల్గొన్నారు.