లింకు పంపి.. ఖాతా లూటీ

పరిగి గ్రామీణ: మొబైల్‌కు వచ్చిన లింకును నొక్కడంతో బ్యాంకు ఖాతాలో ఉన్న డబ్బంతా సైబర్‌ నేరగాళ్లు దోచేశారు. ఈ సంఘటన దోమ మండల పరిధిలోని కిష్టాపూర్‌లో చోటు చేసుకుంది. బాధితుడు తెలిపిన వివరాలిలా ఉన్నాయి... గ్రామానికి చెందిన నితిన్‌ తన సోదరి వివాహం కోసం రూ.1.02 లక్షల నగదు బ్యాంకులో దాచుకున్నాడు. కొన్ని వస్తువుల కొనుగోలు నిమిత్తం.. ఆన్‌లైన్‌ సేవలు పనిచేయడంలేదని అంతర్జాలం నుంచి కస్టమర్‌ కేర్‌ నంబరు సంపాదించి ఫోన్‌ చేశాడు. కొద్ది క్షణాల్లోనే అటు నుంచి లింకు రావడంతో దాన్ని నొక్కాడు. వెంటనే ఖాతాలో ఉన్న డబ్బంతా మాయమైంది. దీంతో ఆందోళన చెందిన ఆయన బుధవారం పరిగి పోలీసులను ఆశ్రయించి ఫిర్యాదు చేశాడు. పూర్తి సమాచారం సేకరించి సైబర్‌ క్రైంకు పంపనున్నట్లు ఎస్సై విఠల్‌రెడ్డి తెలిపారు.