నిర్విరామంగా రిజిస్ట్రేషన్లు

రాత్రి 7 గంటల వరకూ కొనసాగింపు

ఈనాడు, హైదరాబాద్‌: స్థిరాస్తి రిజిస్ట్రేషన్లతో నగరంలోని రిజిస్ట్రేషన్‌ కార్యాలయాలు కళకళలాడుతున్నాయి. ఫిబ్రవరి 1 నుంచి స్థిరాస్తి విలువలు పెరుగుతున్న నేపథ్యంలో ఈలోపే పూర్తిచేయాలని చాలామంది త్వరపడుతున్నారు. పలు కారణాలతో వాయిదా వేసుకుంటూ వచ్చిన వారు రిజిస్ట్రేషన్ల కార్యక్రమాన్ని పూర్తి చేస్తున్నారు. ఉదయం 10.30 గంటలకే కార్యాలయాలు కిక్కిరిసిపోతున్నాయి. సాధారణ రోజుల్లో 20 అయ్యే రిజిస్ట్రేషన్లు ప్రస్తుతం 45-50 చొప్పున అవుతున్నట్లు సబ్‌ రిజిస్ట్రార్‌లు చెబుతున్నారు. హైదరాబాద్‌లోని కార్యాలయాల్లో ఇది సాధారణమే అయినా రంగారెడ్డి జిల్లాతో పాటు.. మేడ్చల్‌ జిల్లాలోనూ గణనీయంగా పెరిగాయని అధికారులు చెబుతున్నారు. రాత్రి 7-8 గంటల వరకూ కార్యాలయాలు రద్దీగా కనిపించాయి. రంగారెడ్డి జిల్లాలోని సబ్‌రిజిస్ట్రార్‌ కార్యాలయాల్లో సాధారణంగా రోజుకి 75-100 డాక్యుమెంట్లు రిజిస్ట్రేషన్‌ అయ్యేవి.. ప్రస్తుతం ఆ సంఖ్య 200 దాటుతున్నట్లు సబ్‌రిజిస్ట్రార్‌ సుబ్బారావు తెలిపారు.