వీర్లపల్లిలో అడవి పంది బీభత్సం

ఇద్దరికి గాయాలు

నందిగామ, న్యూస్‌టుడే: వేటగాళ్ల వలల నుంచి తప్పించుకున్న ఓ అడవి పంది గ్రామంలోకి బీభత్సం సృష్టించిన ఘటన రంగారెడ్డి జిల్లా నందిగామ మండలం వీర్లపల్లిలో శుక్రవారం చోటుచేసుకుంది. గ్రామ శివారులో గుర్తుతెలియని వేటగాళ్లు వలలు వేయగా తప్పించుకుని గ్రామంలోకి చొరబడింది. ఇంటి బయట ఆడుకుంటున్న దుబ్బ రమేష్‌ ఐదేళ్ల కుమార్తెను కరవడంతో చేయి మూడుచోట్ల విరిగింది. అనంతరం రంగం రవి ఇంట్లోకి వెళ్లి అతన్ని గాయపరిచింది. వెంటనే గ్రామానికి వచ్చిన వేటగాళ్లు వలవేసి అడవిపందిని బంధించేందుకు ప్రయత్నించగా.. వీరంగం సృష్టించింది. దీంతో గొడ్డళ్లు, కర్రలతో దాడి చేసి అంతమొందించారు. గ్రామస్థులు గాయపడిన ఇద్దరిని ఆసుపత్రికి తరలించారు.