భార్యా హంతకుడికి జీవిత ఖైదు

రంగారెడ్డి జిల్లా కోర్టులు, న్యూస్‌టుడే: భార్యను గొడ్డలితో నరికి చంపిన భర్తకు న్యాయస్థానం జీవిత ఖైదు విధించింది. పబ్లిక్‌ ప్రాసిక్యూటర్‌ కొంగర రాజిరెడ్డి కథనం ప్రకారం నల్గొండ జిల్లా చింతపల్లి మండలం ఘాసిరాంతాండాకు చెందిన ఆటో డ్రైవర్‌ రమావత్‌ శ్రీను వివాహం 1996లో రంగారెడ్డిజిల్లా యాచారం మండలం తక్కళ్లపల్లికి చెందిన లలితతో జరిగింది. 1999లో శ్రీను, లలిత దంపతులు ఉపాధి కోసం తక్కళ్లపల్లికి వచ్చి ఇంటిని నిర్మించుకున్నారు. శ్రీను తాగుడుకు బానిసై భార్య ప్రవర్తనపై అనుమానం వ్యక్తం చేస్తూ నిత్యం గొడవ పడేవాడు. ఈ క్రమంలో 2021 మార్చి 29న ఇద్దరూ ఘర్షణ పడ్డారు. కోపంతో రగిలిపోయిన శ్రీను అదే రోజు అర్ధరాత్రి నిద్రిస్తున్న లలితపై గొడ్డలితో దాడి చేసి హత్య చేశాడు.   కేసు విచారించిన సైబరాబాద్‌ మెట్రోపాలిటన్‌ సెషన్స్‌ న్యాయమూర్తి ఆర్‌.తిరుపతి బుధవారం తీర్పు వెలువరించారు.