ట్రక్కులు అపహరించి తుక్కు చేస్తున్న ముగ్గురి అరెస్టు

శంషాబాద్‌: పార్కింగ్‌ చేసిన ట్రక్కులు అపహరించి తుక్కు చేసి విక్రయిస్తున్న ముగ్గురిని శంషాబాద్‌ పోలీసులు గురువారం కటకటాల్లోకి నెట్టారు. హరియాణాకు చెందిన ఓ ట్రక్కు, ఓ కారు, బైక్‌, రూ.50 నగదు స్వాధీనం చేసుకున్నారు. శంషాబాద్‌ జోన్‌ డీసీపీ ఆర్‌.జగదీశ్వర్‌రెడ్డి తెలిపిన వివరాల ప్రకారం.. హైదరాబాద్‌, నాంపల్లికి చెందిన షేక్‌ హజీ లారీ మెకానిక్‌. గగన్‌పహాడ్‌లో ట్రక్కులకు మరమ్మతులు చేస్తుండేవాడు. అందులో నష్టపోయి అన్వర్‌తో కలిసి ట్రక్కుల చోరీ బాట పట్టాడు. గతంలో మైలార్‌దేవ్‌పల్లి, నల్గొండ ఠాణా పరిధిలో లారీలను చోరీ చేసి హజీ జైలుకు వెళ్లాడు. బెయిల్‌పై బయటకు వచ్చి బహదూర్‌పురాకు చెందిన ఎండీ.ఇర్ఫాన్‌, కాలపత్తార్‌కు చెందిన ఎండీ.అహ్మద్‌పాషా, ఎండీ.అన్వర్‌, ఎండీ.ఫైసల్‌, ఎండీ నిజాం, ఎండీ హలీమ్‌తో కలిసి ముఠాగా ఏర్పడ్డారు. ట్రక్కులు చోరీ చేసి అధిక ధరలకు విక్రయించడం, తుక్కు చేసి సొమ్ము చేసుకుంటున్నారు. ఈ నెల 8న పాలమాకుల వద్ద పార్కింగ్‌ చేసిన ఓ ట్రక్కును అపహరించి తుక్కుగా మార్చి బీదర్‌లో అమ్మేశారు. అనుమానాస్పద స్థితిలో తిరుగుతున్న షేక్‌ హజీ, ఇర్ఫాన్‌, అహ్మద్‌ పాషాలను అదుపులోకి తీసుకుని విచారించగా గుట్టురట్టయింది.