Hyd News: వైద్యుడి వేషంతో ఐసీయూలోకి అక్రమంగా ప్రవేశించి..

పంజాగుట్ట, న్యూస్‌టుడే: వైద్యుడి వేషంతో ఆసుపత్రి ఐసీయూలోకి ప్రవేశించడమే కాకుండా రోగి బంధువులను డబ్బులు డిమాండ్‌ చేసిన వ్యక్తిని పంజాగుట్ట పోలీసులు అరెస్టు చేశారు. ఆలస్యంగా వెలుగు చూసిన ఈ సంఘటన వివరాలను పంజాగుట్ట సీఐ హరిశ్చంద్రారెడ్డి తెలిపారు. ఓ వ్యక్తి అనారోగ్యంతో బాధపడుతుండటంతో బంజారాహిల్స్‌ లోని విరించి ఆసుపత్రిలో చేర్చించారు. ఐసీయూలో చికిత్స అందిస్తున్నారు. ఈనెల 16న గుర్తుతెలియని వ్యక్తి వైద్యుడి వేషధారణతో ఐసీయూలోకి వెళ్లాడు. రోగి కేసష్‌ీట్‌ను పరిశీలించి ఫోన్‌ నంబరు తీసుకున్నాడు. రోగి బంధువులకు ఫోన్‌ చేసి అత్యవసర శస్త్రచికిత్స చేయాలని, తక్షణం రూ.50వేలు పంపించాలని చెప్పాడు. విస్తుపోయిన బంధువులు తమకు ఈఎస్‌ఐ వర్తిస్తుందని, డబ్బులెందుకు ఇవ్వాలంటూ ప్రశ్నించారు. ఆసుపత్రి యాజమాన్యం ద్వారా పోలీసులకు ఫిర్యాదు చేయడంతో కేసు నమోదు చేశారు. నిందితుణ్ని సంతోష్‌నగర్‌కు చెందిన మహ్మద్‌ జకీరుద్దీన్‌(19)గా గుర్తించి రిమాండ్‌కు తరలించారు.