సత్వరం ఉపాధి కూలీలకు ఖాతాలు

డీఆర్‌డీఓ కృష్ణన్‌తో కలిసి మాట్లాడుతున్న కలెక్టర్‌ నిఖిల

వికారాబాద్‌ కలెక్టరేట్‌, న్యూస్‌టుడే: జిల్లాలో అపరిష్కృతంగా ఉన్న 16 వేల ఉపాధి హామీ కూలీల ఖాతాలను వెంటనే తెరిపించాలని పాలనాధికారిణి నిఖిల అధికారులను అదేశించారు. శనివారం దృశ్య మాధ్యమం ద్వారా డీఆర్‌ డీఓ కృష్ణన్‌తో కలిసి ఎంపీడీఓలు, ఎంపీఓలు, ఏపీఓలతో ఉపాధి హామీ, హరితహారం పనులపై సమీక్షించారు. ఈ సందర్భంగా ఆమె మాట్లాడుతూ శనివారం రాత్రి, ఆదివారం అధికారులు పల్లెల్లో నిద్ర చేసి ప్రత్యేక డ్రైవ్‌ నిర్వహించాలన్నారు. గ్రామాల్లో బృందాలుగా ఏర్పాటు చేసి సోమవారం లోపు వంద శాతం ఖాతాలను తెరిపించాలని సూచించారు. పల్లె నిద్రలో పంచాయతీ కార్యదర్శులు తప్పనిసరిగా గ్రామాల్లో ఉండాలని, విధుల్లో నిర్లక్ష్యం వహించే అధికారులపై చర్యలు తప్పవని ఆమె పేర్కొన్నారు.

పెద్దేముల్‌ మండల ఏపీఓపై వేటు

ఉపాధి హామీ పథకం విధులలో నిర్లక్ష్యంగా వ్యవహరించిన పెద్దేముల్‌ మండల ఏపీఓ నర్సిములును పాలనాధికారిణి నిఖిల సస్పెండ్‌ చేశారు. శనివారం కలెక్టర్‌ కార్యాలయ సమావేశ హాల్‌లో ఉపాధి హామీ, హరితహారంపై అధికారులతో దృశ్య మాధ్యమ సమావేశాన్ని నిర్వహించారు. ఈ సందర్భంగా కూలీలకు కూలీ చెల్లింపులో జాప్యంతో పాటు విధులపై నిర్లక్ష్యం వహిస్తున్న విషయాన్ని గుర్తించి సస్పెండ్‌ చేశారు.