ఆకతాయిలూ.. ఆటలు చెల్లవిక!

కౌన్సెలింగ్‌ ఇస్తున్న సైకాలజిస్టులు

ఈనాడు, హైదరాబాద్‌: ఆకతాయిల వికృతచేష్టలకు కళ్లెం వేసేందుకు రాచకొండ పోలీసులు మరింతగా పకడ్బందీ చర్యలు చేపట్టారు. ప్రతిరోజూ సాయంత్రం 5 నుంచి రాత్రి 8 గంటల వరకూ కొన్ని ప్రాంతాల్లో పోకిరీలు రెచ్చిపోతున్నారు. వీటిని కట్టడి చేసేందుకు రాచకొండ పోలీసు కమిషనరేట్‌ పరిధిలోని 380 హాట్‌స్పాట్స్‌లో షీటీమ్స్‌ను ఏర్పాటు చేశారు.

కొరియర్‌ బాయ్‌.. అసభ్య పదజాలం.. ఘటకేసర్‌కు చెందిన ఐటీ ఉద్యోగిని(37). పనిచేసే సంస్థ ఆమెకు యూఎస్‌బీ పరికరం కొరియర్‌ ద్వారా పంపింది. కొరియర్‌ బాయ్‌ కేశ శివగౌడ్‌(20) రాత్రి 8.45 గంటల సమయంలో పరికరం అందజేసేందుకు బాధితురాలి ఇంటికి వెళ్లాడు. రాత్రివేళ కొరియర్‌ తీసుకునేందుకు సరైన సమయం కాదని తిరస్కరించారు. దీంతో కొరియర్‌ బాయ్‌ దూషించాడు. బాధితురాలి ఫిర్యాదుతో ఘటకేసర్‌ పోలీసులు నిందితుడిని అరెస్ట్‌ చేసి రిమాండ్‌కు తరలించారు.

79 మంది పోకిరీలు.. రాచకొండ షీటీమ్స్‌ 8 వారాల వ్యవధిలో 79మంది పోకిరీలపై కేసులు నమోదు చేశారు. కుటుంబ సభ్యుల సమక్షంలో శనివారం ఎల్బీనగర్‌ రాచకొండ కమిషనరేట్‌ క్యాంపు కార్యాలయంలో షీటీమ్స్‌ డీసీపీ షేక్‌ సలీమా, డాక్టర్‌ వాసవి భూమిక స్వచ్ఛంద సంస్థ సైకాలజిస్టులు కౌన్సెలింగ్‌ ఇచ్చారు.

పుత్తడి బొమ్మలకు రక్షణ.. పేదరికం, నిరక్షరాస్యత, అవగాహన లేక కొన్ని కుటుంబాలు ఆడపిల్లలకు యుక్తవయసు రాకముందే పెళ్లిళ్లు చేస్తున్నారు. బాల్యవివాహాలను కట్టడి చేసేందుకు భువనగిరి, యాదగిరిగుట్ట, మల్కాజిగిరి, వనస్థలిపురం, ఇబ్రహీంపట్నం ప్రాంతాల్లో మహిళా స్వయంశక్తి సంఘాలకు అవగాహన కల్పించారు. 2 నెలల వ్యవధిలో 11 బాల్యవివాహాలను అడ్డుకున్నారు. ఈ మేరకు రాచకొండ షీ బృందాలు, డీసీపీ షేక్‌ సలీమాను సీపీ మహేష్‌ భగవత్‌ అభినందించారు. వేధింపులపై 94906 17111, డయల్‌ 100 ద్వారా ఫిర్యాదు చేయవచ్చని డీసీపీ సలీమా సూచించారు.