నా భార్యను పంపకుండా వేధించారు

మామ, బావమరిదిని శిక్షించాలని లేఖ రాసి యువకుడి బలవన్మరణం

వినోద్‌కుమార్‌

ఆదిభట్ల, న్యూస్‌టుడే: తన మరణానికి బావమరిది, మామ కారణమని.. వారిని శిక్షించాలని లేఖ రాసి ఓ యువకుడు బలవన్మరణానికి పాల్పడిన సంఘటన ఆదిభట్ల ఠాణా పరిధిలో చోటు చేసుకుంది. ఎస్సై సురేష్‌, స్థానికులు తెలిపిన వివరాల ప్రకారం.. ఆదిభట్ల మున్సిపల్‌ పరిధిలోని కొంగరకలాన్‌కు చెందిన మంకాల అశోక్‌, సుగుణమ్మ దంపతుల చిన్న కుమారుడు వినోద్‌కుమార్‌(29) కొంగర కలాన్‌లో క్షౌరశాల నిర్వహిస్తున్నాడు. ఐదేళ్ల క్రితం బడంగ్‌పేటకు చెందిన సౌమ్యతో వివాహమైంది. వీరికి ఇద్దరు కుమారులు. సౌమ్య తండ్రి రవీందర్‌ అవసరం నిమిత్తం డబ్బు కావాలని కోరడంతో వినోద్‌కుమార్‌ ఏడాది క్రితం రూ.4.73 లక్షలు అప్పు ఇప్పించాడు. సౌమ్య ఆ డబ్బు తీసుకొస్తానని పుట్టింటికి వెళ్లింది. నెల రోజులు గడిచినా రాలేదు. బావమరిది సాయికృష్ణ, మామ కలిసి తన భార్యను రాకుండా ఆపుతున్నారని తల్లిదండ్రులతో చెప్పి బాధపడ్డాడు. శనివారం రాత్రి ఇంట్లో ఉరి వేసుకుని బలవన్మరణానికి పాల్పడ్డాడు. తన కుమారుడి మరణానికి కారణమైన రవీందర్‌, సాయికృష్ణలపై చర్యలు తీసుకొని న్యాయం చేయాలని పోలీసులకు ఫిర్యాదు చేయగా కేసు దర్యాప్తు చేస్తున్నారు.