రోడ్డు ప్రమాదంలో డిగ్రీ విద్యార్థి దుర్మరణం

బాలానగర్‌, న్యూస్‌టుడే: ద్విచక్ర వాహనంపై వెళ్తున్న ఓ యువకుడిని వెనుక నుంచి వేగంగా వచ్చిన మరో ద్విచక్ర వాహనం ఢీకొట్టడంతో ఆ యువకుడు కిందపడి తీవ్రగాయాలకు గురై ఆసుపత్రిలో చికిత్స పొందుతూ మృతిచెందాడు. బాలానగర్‌ సీఐ వహీదుద్దీన్‌ కథనం ప్రకారం.. నాగార్జునకాలనీకి చెందిన సయ్యద్‌ ఆరిఫ్‌ (19) కూకట్‌పల్లి ప్రభుత్వ డిగ్రీ కళాశాలలో ద్వితీయ ఏడాది చదువుతున్నాడు. బుధవారం ఉదయం కళాశాలకు వెళ్లి వస్తానని ఇంట్లో చెప్పి ద్విచక్ర వాహనంపై బయలుదేరాడు. బాలానగర్‌ వంతెనపైకి రాగానే వెనుక నుంచి వేగంగా వచ్చిన గుర్తుతెలియని మరో ద్విచక్ర వాహనం ఢీకొట్టింది. దీంతో ఆరిఫ్‌ కిందపడగా తలకు తీవ్రగాయాలయ్యాయి. అటుగా వెళుతున్న కొందరు పడిపోయిన వ్యక్తి జేబులో నుంచి సెల్‌ఫోన్‌ తీసుకొని అందులోని కుటుంబ సభ్యులకు ఫోన్‌ చేశారు. ఓ ప్రైవేటు ఆసుపత్రిలో చికిత్స పొందుతూ ఆరిఫ్‌ మృతి చెందాడు.