వడివడిగా క్రీడా మైదానాల గుర్తింపు: కలెక్టర్‌

అధికారులతో మాట్లాడుతున్న పాలనాధికారిణి

పూడూరు, న్యూస్‌టుడే: ప్రభుత్వ ఆదేశాల మేరకు మండలాల వారీగా ఏర్పాటు చేయనున్న క్రీడా మైదానాలను అనువైన స్థలాల్లో గుర్తించే ప్రక్రియను వేగవంతం చేయాలని పాలనాధికారిణి నిఖిల పేర్కొన్నారు. పూడూరు మండల పరిధిలోని మీర్జాపూర్‌, మన్నెగూడ గ్రామాలను  బుధవారం ఆమె సందర్శించారు. మైదానాల ఏర్పాటుకు అనుకూలంగా ఉన్న ప్రభుత్వ స్థలాలను పరిశీలించారు. ఈ సందర్భంగా  మాట్లాడుతూ వివిధ రకాల ఆటల నిర్వహణకు మైదానాలను తయారు చేయాలని ఆదేశించారు. అనంతరం మన ఊరు - మనబడిలో భాగంగా కడ్మూరు ఉన్నత పాఠశాలను సందర్శించారు. జూన్‌ రెండు నాటికి విద్యార్థులకు కావలసిన మౌలిక సదుపాయాలు కల్పించాలన్నారు. కార్యక్రమంలో డీఆర్‌డీఓ కృష్ణన్‌, తహసీల్దారు కిరణ్‌, ఎంపీడీఓ ఉమాదేవి, డీఈ రాజు, పాఠశాల ప్రధానోపాధ్యాయులు కృష్ణయ్య ఉన్నారు.