చార్‌ధామ్‌ యాత్రలో షేక్‌పేట్‌ వాసి మృతి

పూస అశోక్‌

గోల్కొండ, న్యూస్‌టుడే: చార్‌ధామ్‌యాత్రకు వెళ్లిన ఓ కుటుంబంలో విషాదం అలముకుంది. గంగోత్రినదిలో నీటి ప్రవాహానికి కొట్టుకుపోయి షేక్‌పేట్‌కు చెందిన వ్యక్తి మృతి చెందాడు. కుటుంబసభ్యుల కథనం ప్రకారం.. హైదరాబాద్‌ నగరంలోని షేక్‌పేట్‌, మారుతీనగర్‌కాలనీకి చెందిన పూస అశోక్‌ (65) బీఎస్‌ఎన్‌ఎల్‌ విశ్రాంత ఉద్యోగి. ఇతనికి ఇద్దరు కూతుళ్లు, ఓ కుమారుడు ఉన్నారు. వారం క్రితం అశోక్‌ కుటుంబసభ్యులు, బంధువులతో కలిసి చార్‌ధామ్‌యాత్రకు వెళ్లారు. బుధవారం గంగోత్రినదిలో స్నానానికి దిగిన అశోక్‌ నీటి ప్రవాహానికి కొంత దూరం కొట్టుకుపోవడంతో కుటుంబసభ్యులు వెంటనే బయటకు తీశారు. అనంతరం ఆసుపత్రికి తరలించే క్రమంలో మృతి చెందారు. సమీపంలోని ఓ ఆసుపత్రిలో పోస్టుమార్టం చేశారు. అతని మృతదేహాన్ని శుక్రవారం ఉదయం విమానంలో నగరానికి తీసుకువస్తున్నట్లు కుటుంబసభ్యులు తెలిపారు.