139 మందిపై పీటీ వారెంట్‌

ఈనాడు, హైదరాబాద్‌: సైబర్‌ నేరస్థుల ఆగడాలకు అడ్డుకట్ట వేసేందుకు జైలు శిక్షలే సరైన పరిష్కారంగా పోలీసులు భావిస్తున్నారు. మాయగాళ్ల నేరాలను న్యాయస్థానాల్లో నిరూపించి శిక్షలు పడేలా చేసేందుకు సైబరాబాద్‌ పోలీసు కమిషనరేట్‌ పరిధిలో చర్యలు తీసుకుంటున్నారు. ఇందులో భాగంగా ఒక కేసులో అరెస్టైన వారికి ఇతర కేసుల్లో ప్రమేయం ఉంటే సైబర్‌క్రైమ్‌, ఆయా ఠాణాలు పీటీ వారెంట్‌పై అదుపులోకి తీసుకొని విచారిస్తున్నారు. 15 రోజుల వ్యవధిలోనే 139 మంది సైబర్‌ నిందితులపై పీటీ వారెంట్‌ దాఖలు చేసినట్టు సమాచారం. ప్రతి కేసులోనూ నిందితులను వేర్వేరుగా అరెస్ట్‌ చేయటంతో నిందితులు జ్యుడిషియల్‌ రిమాండ్‌లోనే 6-7 నెలల సమయం ఉండాల్సి వస్తోంది. అన్ని కేసుల్లోనూ వీలైనంత త్వరితగతిన ఛార్జిషీటు దాఖలు చేసి శిక్షలు పడేలా న్యాయనిపుణుల సలహాలు తీసుకుంటున్నారు.