ఇన్‌స్టాగ్రామ్‌లో యువతికి అసభ్య సందేశాలు

కీసర, న్యూస్‌టుడే: నకిలీ ఇన్‌స్టాగ్రామ్‌ సృష్టించి పెళ్లి నిశ్చయమైన యువతితో పాటు అబ్బాయి కుటుంబ సభ్యులకు అనుచిత సందేశాలు పంపిన యువకున్ని రాచకొండ సైబర్‌ క్రైం పోలీసులు అరెస్టు చేశారు. సైబర్‌ క్రైం ఇన్‌స్పెక్టర్‌ ఆర్‌.వెంకటేష్‌ తెలిపిన వివరాల ప్రకారం.... వికారాబాద్‌కు చెందిన జాతావత్‌ సిద్దు(22) కీసరలోని సిద్ధార్థనగర్‌కాలనీలో నివసిస్తూ ప్రైవేటు ఉద్యోగం చేస్తున్నాడు. తాను పెళ్లి చేసుకోవాలనుకున్న అమ్మాయికి మరొకరితో వివాహం నిశ్చయమైంది. ఎలాగైనా ఆమె పెళ్లి రద్దు చేయాలనే పథకం పన్నాడు. యువతి పరువు తీసేందుకు నకిలీ ఇన్‌స్ట్రాగామ్‌ ఐడీని సృష్టించాడు. అమ్మాయి బంధువులతో పాటు కాబోయే పెళ్లి కొడుకు ఫోన్‌ నంబరుకు అవమానకరమైన, అసభ్యకరమైన సందేశాలతో పోస్ట్‌ చేశాడు. అమ్మాయిపై ఉన్న మంచి అభిప్రాయాన్ని దూరం చేసేందుకు కుటుంబ సభ్యులకు సందేశాలు పంపాడు. బాధితుడు ఇచ్చిన ఫిర్యాదు మేరకు కేసు నమోదు చేసుకున్న సైబర్‌ క్రైం పోలీసులు దర్యాప్తు చేపట్టారు. అన్ని సాంకేతిక ఆధారాలను సేకరించి, డేటాను విశ్లేషించిన తర్వాత విశ్వసనీయ సమాచారం మేరకు సిద్దును అరెస్టు చేసి న్యాయస్థానంలో హాజరు పరిచారు. జ్యుడీషియల్‌ కస్టడీకి తరలించారు.