అర్ధరాత్రి దాటే వరకూ ఆటాపాట!

పోలీసుల హెచ్చరికలు పట్టించుకోని పబ్‌లు

జూబ్లీహిల్స్‌లో ఓ పబ్‌ వద్ద రాత్రివేళ గొడవ పడుతున్న యువకులు

ఈనాడు, హైదరాబాద్‌ న్యూస్‌టుడే, జూబ్లీహిల్స్‌: నగరంలోని పలు పబ్‌లు పోలీసుల హెచ్చరికల్ని పెడచెవిన పెడుతున్నాయి. ఇటీవలే చోటుచేసుకున్న ఘటనల నేపథ్యంలో రెండుసార్లు పోలీసు, ఆబ్కారీ ఉన్నతాధికారులు పబ్‌ల నిర్వాహకులతో సమావేశాలు నిర్వహించి, నిబంధనలు పాటించకపోతే కేసులు నమోదు చేస్తామంటూ హెచ్చరించారు. దీంతో కొద్దిరోజులు కట్టుబడినట్లు కనిపించినా వారాంతాల్లో ఇష్టానుసారంగా వ్యవహరిస్తున్నారు. జూబ్లీహిల్స్‌, మాదాపూర్‌, గచ్చిబౌలి ప్రాంతాల్లోని పబ్‌లు అర్ధరాత్రి దాటేంత వరకూ తెరిచే ఉంటున్నాయి. తనిఖీ చేసేందుకు వెళ్లిన పోలీసులతో మద్యం మత్తులో ఉన్న యువత గొడవకు దిగుతున్నారు. వారిలో ప్రముఖుల పిల్లలే అధికంగా ఉండటంతో వారు తలలు పట్టుకుంటున్నారు. పోలీసు, ఆబ్కారీ శాఖల సమన్వయం కొరవడంతో పబ్‌లు ఆడింది ఆట.. పాడింది పాటగా పరిస్థితి తయారైందనే ఆరోపణలు ఉన్నాయి.

ఇటీవలి కొన్ని ఘటనలు..

* జూబ్లీహిల్స్‌లోని ఓ కాఫీ క్లబ్‌ వద్ద శనివారం అర్ధరాత్రి కారెక్కుతున్న ఓ యువతితో యువకుడు అసభ్యంగా ప్రవర్తించటంతో మొదలైన గొడవ కొట్లాటకు దారి తీసింది. అక్కడికు వచ్చిన పోలీసులు నిలువరించేందుకు ప్రయత్నించినా ఫలితం లేకుండా పోయింది. మద్యం మత్తులో ఉన్న యువకుడు ‘పోలీసులైతే ఏంటి? అంటూ ఎస్సైను నెట్టివేసేందుకు ప్రయత్నించినట్లు సమాచారం.

* ఇటీవల రాయదుర్గం పోలీస్‌స్టేషన్‌ పరిధిలోని బార్‌లో యువతి ఫోన్‌ నంబరు అడిగితే ఇవ్వనంటూ తిరస్కరించటంతో రెచ్చిపోయిన యువకుడు అత్యాచారం చేస్తానంటూ బెదిరించాడు. ఇది గొడవకు దారి తీయడంతో పోలీసులు కేసు నమోదు చేశారు.

* జూబ్లీహిల్స్‌లోని ఓ పబ్‌లో భార్యాభర్తల్ని బౌన్సర్లు బయటకు నెట్టేయటంతో బాధితులు పోలీసులను ఆశ్రయించారు.

* గచ్చిబౌలి వద్ద మద్యం మత్తులో యువకుడు  ఓ యువతితో అసభ్యంగా ప్రవర్తించాడు.