మైనర్ల ప్రేమ విషాదాంతం

శుక్రవారం బాలుడి మృతదేహం గుర్తింపు

జీడిమెట్ల, న్యూస్‌టుడే: జీడిమెట్లలో కలకలం సృష్టించిన మైనర్‌ ప్రేమ జంట కథ విషాదాంతమైంది. కనీసం బాలుడైనా ప్రాణాలతో ఉంటాడని అనుకున్నా.. ఒక రోజు తర్వాత చెరువులో మృతదేహం లభించడంతో ఇరు కుటుంబాలూ శోకసంద్రంలో మునిగాయి. తొమ్మిదో తరగతి బాలుడు(14), బాలిక(14) ప్రేమ విషయం ఇళ్లలో తెలియడంతో బుధవారం ఇంటి నుంచి పారిపోయిన విషయం తెలిసిందే. ఇద్దరూ చున్నీతో కట్టుకొని ఫాక్స్‌సాగర్‌ చెరువులో దూకినట్లు పోలీసులు నిర్ధారణకు వచ్చారు. బాలిక నుంచి చున్నీ వేరు కావడంతో మరుసటి రోజే మృతదేహం నీటిలో తేలింది. బాలుడి మృతదేహం శుక్రవారం ఉదయం నీటిపై తేలినట్లు పోలీసులు గుర్తించారు. ఈ ఘటనపై కేసు నమోదు చేసుకున్నట్లు ఇన్‌స్పెక్టర్‌ బాలరాజు పేర్కొన్నారు.