అమాయకులను మోసం చేస్తున్న..కాల్‌సెంటర్‌ గుట్టురట్టు

నారాయణగూడ, న్యూస్‌టుడే: సైబర్‌ దొంగల ఆటకట్టించేందుకు హైదరాబాద్‌ సైబర్‌ పోలీసులు కంకణబద్ధులయ్యారు. బ్యాంక్‌ ఖాతాల కేవైసీ అప్‌డేట్‌ చేసుకోవాలని, క్రెడిట్‌, డెబిట్‌ కార్డుల లిమిట్‌ పెంచుతామంటూ.. ప్రజలను మోసం చేస్తున్న ఝార్ఖండ్‌ ముఠాను కొన్నాళ్ల కింద అరెస్టుచేసి జైలుకు పంపించారు. ప్రస్తుతం మరో ముఠాను  దిల్లీలో అదుపులోకి తీసుకున్నట్లు సమాచారం. ఈ ముఠా దేశ రాజధానిలో ప్రత్యేకంగా కాల్‌ సెంటర్‌ను ఏర్పాటుచేసి, అమాయకులకు ఫోన్లు చేసి డబ్బు దండుకుంటున్నారని పోలీసుల విచారణ వెల్లడైంది. ముఠాలోని 10 మందిని అదుపులోకి తీసుకున్నట్లు తెలిసింది. త్వరలోనే ఈ సైబర్‌ కేటుగాళ్లను నగరానికి తీసుకొస్తారని తెలిసింది.