భాగ్యనగరాన.. భాజపా ప్రతిన

 తరలొచ్చిన భాజపా అతిరథులు

రాజధానిలో కాషాయ కళ

కమలం.. మా బలం: ప్రధాని మోదీకి స్వాగతం పలికేందుకు బేగంపేట విమానాశ్రయానికి తరలొచ్చిన భాజపా కార్యకర్తలు

భాజపా జాతీయ కార్యవర్గ సమావేశాలు శనివారం హైదరాబాద్‌లోని హెచ్‌ఐసీసీ నోవాటెల్‌లో అట్టహాసంగా ప్రారంభమయ్యాయి. సంస్థాగత సంబరాలుగా భావించే వీటి కోసం ఆ పార్టీ తెలంగాణ శాఖ ఘనంగా ఏర్పాట్లు చేసింది. దేశవ్యాప్తంగా తరలివచ్చిన ఆ పార్టీ అగ్ర నేతలతో నగరం కళకళలాడింది.
విజయ సంకల్ప సభకు పార్కింగ్‌ ప్రాంతాలు
విజయ సంకల్ప సభకు వస్తున్న అగ్రనేతలు, కార్యకర్తల వాహనాలను నిలిపేందుకు వీలుగా హైదరాబాద్‌ ట్రాఫిక్‌ పోలీసులు ప్రత్యేకంగా పార్కింగ్‌ ప్రాంతాలను ఎంపిక చేశారు.
* కరీంనగర్‌, సిరిసిల్ల, సిద్దిపేట, పెద్దపల్లి, జగిత్యాల, మంచిర్యాల జిల్లా నుంచి వచ్చే కార్యకర్తలు హాకీ మైదానంలో తమ వాహనాలను నిలపాలి. అక్కడి నుంచి ధోబీఘాట్‌, బ్రూక్‌బ్రాండ్‌, టివోలీ, స్వీకార్‌-ఉప్‌కార్‌ మీదుగా బహిరంగ సభకు చేరుకోవాలి.

* ఆదిలాబాద్‌, నిర్మల్‌, నిజామాబాద్‌, కామారెడ్డి, మెదక్‌, సంగారెడ్డి జిల్లాల నుంచి వచ్చే కార్యకర్తలు ఎన్‌సీసీ(బైసన్‌ పోలో గ్రౌండ్స్‌)మైదానంలో వాహనాలను నిలిపాలి.
*రంగారెడ్డి, నాగర్‌కర్నూల్‌, అచ్చంపేట్‌, నల్గొండ, ఖమ్మం, సూర్యాపేట, వరంగల్‌, యాదాద్రి జిల్లాల నుంచి వచ్చే కార్యకర్తలు రైల్వే నిలయం మైదానం, తార్నాకలోని రైల్వే డిగ్రీ కళాశాలలో వాహనాలను నిలపాలి.
* రంగారెడ్డి, వికారాబాద్‌, మహబూబ్‌నగర్‌ జిల్లాల నుంచి వచ్చే కార్యకర్తలు సంజీవయ్య పార్కు/బుద్ధభవన్‌/నెక్లెస్‌రోడ్‌/నల్లగుట్ట ప్రాంతాల్లో వాహనాలను నిలపాలి.
* నగరం భాజపా కార్యకర్తలు తమ వాహనాలను ఎన్టీఆర్‌ స్టేడియంలో నిలపాలి.     

    -ఈనాడు, హైదరాబాద్‌