సభ ముగిశాక జోరు వాన

ఈనాడు, హైదరాబాద్‌: సికింద్రాబాద్‌ పరేడ్‌ మైదానంలో భాజపా విజయ సంకల్ప సభ జరుగుతున్న సమయంలో వాన చినుకులు పలుకరించినా పెద్దగా ఇబ్బంది పెట్టలేదు. సభ ముగిశాక సికింద్రాబాద్‌, కంటోన్మెంట్‌, తార్నాక, బేగంపేట్‌ తదితర ప్రాంతాల్లో గాలివాన దుమారం రేపింది. అప్పటికే సభకు హాజరైన కార్యకర్తలు తమ వాహనాల్లోకి ఎక్కడంతో భాజపా నాయకులు ఊపిరి పీల్చుకున్నారు. ఇదిలాఉంటే నగరంలో రాత్రి 10 గంటల తరువాత పలు ప్రాంతాల్లో భారీ వర్షం కురిసింది. అంతకుముందు నగరంలో పలు ప్రాంతాల్లో తేలికపాటి నుంచి ఓ మోస్తరు వర్షం కురిసింది. నగరంలో అత్యధికంగా శివరాంపల్లిలో 18.0 మి.మీ. వర్షం పడింది. రాజేంద్రనగర్‌లో 12.3, ఆసిఫ్‌నగర్‌లో 11.8, నాంపల్లిలో 10.3, షేక్‌పేటలో 8.0, మల్కాజిగిరి 4.5 మి.మీ. వర్షం కురిసింది. బండ్లగూడ, బీహెచ్‌ఈఎల్‌, అత్తాపూర్‌, చార్మినార్‌, మౌలాలిలో జల్లులు పడ్డాయి.