వీడీసీసీ రోడ్లు.. మన్నిక ఎన్నో రెట్లు

రూ.158 కోట్లతో 448 రోడ్ల పనులు

ఈనాడు, హైదరాబాద్‌: గ్రేటర్‌లో గుంతల్లేని రహదారులను సాకారం చేసేందుకు రూ.వందల కోట్ల ఖర్చు చేస్తున్నట్లు జీహెచ్‌ఎంసీ సోమవారం ప్రకటించింది. సంప్రదాయ తారు రోడ్ల విషయంలో.. నీటి నిల్వలు తరచుగా ఏర్పడే చోట, లోతట్టు ప్రాంతాలు, కాలనీల్లో సహజంగా గుంతలు ఎక్కువగా ఏర్పడతాయి. సమస్యను నివారించేందుకు వీడీసీసీ (వాక్యూమ్‌ డీవాటర్డ్‌ సిమెంట్‌ కాంక్రీటు) రోడ్లను నిర్మిస్తున్నామని జీహెచ్‌ఎంసీ ఇంజినీర్లు వెల్లడించారు. సంప్రదాయ సిమెంటు రోడ్లకన్నా ఎక్కువ నాణ్యతతో వీడీసీసీ రోడ్లు ఎక్కువ మన్నిక ఇస్తాయని వివరించారు. ఈ తరహా రహదారులు నిర్మించిన ప్రాంతాల్లో గుంతల ఊసే లేదని, ఫిర్యాదులు బాగా తగ్గాయని ఇంజినీర్లు స్పష్టం చేశారు. ప్రస్తుత 2022-23 ఆర్థిక సంవత్సరంలో రూ.158.67 కోట్లతో 146 కి.మీ పొడవైన 448 రోడ్లను నిర్మించాలని జీహెచ్‌ఎంసీ లక్ష్యంగా పెట్టుకుంది. ఇప్పటికే రూ.10.75కోట్ల విలువైన 29 పనులు పూర్తయ్యాయి. 8 కి.మీ మేర వీడీసీసీ రోడ్లు అందుబాటులోకి వచ్చాయి. 33 కి.మీ పొడవుతో జరుగుతోన్న రూ.41.16 కోట్ల పనులు పురోగతిలో ఉన్నాయి.