hyderabad : మన బ్యాంకే కదా.. వాడేసుకుందాం

రూ.1.62 కోట్లు కుటుంబీకులకు.. అటు నుంచి షేర్ల క్రయవిక్రయాలకు

ఈనాడు, హైదరాబాద్‌: బ్యాంక్‌లో మేనేజర్‌ ఉద్యోగమంటే బ్యాంకంతా మనదే.. మనమే రుణాలు తీసుకుందాం.. షేర్లు కొందాం.. అమ్మేద్దాం.. లాభాలొస్తే జమచేద్దాం.. నష్టాలొస్తే కిస్తీలు కట్టకుండా వదిలేద్దామని హైదరాబాద్‌లోని బ్యాంక్‌ ఆఫ్‌ బరోడా మేనేజర్‌ భావించాడు. అనుకున్నదే తడవుగా బంగారురుణాలపై దృష్టి సారించాడు. సేవింగ్స్‌ బ్యాంక్‌ ఖాతాదారుల వివరాలు సేకరించాడు. అందులో తొమ్మిది మంది పేర్లతో బంగారు రుణాలు తీసుకుని కుటుంబీకుల ఖాతాల్లోకి జమచేశాడు. అటునుంచి తన డీమ్యాట్‌ ఖాతాలోకి జమచేసుకుని షేర్ల క్రయవిక్రయాలు సాగిస్తున్నాడు. ఆర్థిక సంవత్సరం చివర్లో లెక్కలు తీయగా రూ.1.62 కోట్ల అక్రమాలు బయటపడ్డాయి. ఉన్నతాధికారులు హైదరాబాద్‌ సెంట్రల్‌ క్రైమ్‌ పోలీసులకు ఫిర్యాదు చేయగా.. వారు బ్యాంకు మేనేజర్‌ను అరెస్ట్‌ చేశారు. ఆయన డీమ్యాట్‌ ఖాతాలను పరిశీలించి, వాటిల్లోని రూ.1.58 కోట్ల విలువైన షేర్లను స్తంభింపజేశారు.

రూ.35 లక్షల విచక్షణాధికారంతో..

బ్యాంక్‌ ఆఫ్‌ బరోడా బోయిన్‌పల్లి శాఖలో సంతోష్‌ కుమార్‌ స్కేల్‌-2 మేనేజర్‌గా గతేడాది అక్టోబరు నుంచి విధులు నిర్వహిస్తున్నాడు. బంగారంపై గరిష్టంగా రూ.35లక్షల రుణం ఇచ్చే అధికారం ఆయనకు ఉండడంతో, దాన్ని అవకాశంగా మలుచుకున్నాడు. గతేడాది నవంబరు నుంచి ఈ ఏడాది ఏప్రిల్‌ వరకూ బ్యాంకులోని తొమ్మిది పొదుపు ఖాతాల నుంచి రూ.1.62 కోట్లు రుణం తీసుకున్నాడు. రుణం మంజూరుపై సంతకం సంతోష్‌ది ఉండడంతో బంగారం ఉందా? లేదా? అని ఉన్నతాధికారులు గమనించలేదు. తాను సంతకం చేసిన పత్రాలను ధ్రువీకరించేందుకు మరో అధికారికి చెందిన ఐడీలను వినియోగించుకున్నాడు. కిస్తీలు నాలుగైదు నెలల తర్వాత కడతారంటూ పొదుపు ఖాతాలు తీసుకున్న వారి తరఫున సంతోష్‌ చెప్పడంతో బ్యాంకు అధికారులకు అనుమానం రాలేదు..

మార్చిలో తనిఖీలతో వెలుగులోకి