కళాశాలలు.. ఏమాయె!

దౌల్తాబాద్‌, న్యూస్‌టుడే: నియోజకవర్గంలోని దౌల్తాబాద్‌, బొంరాస్‌పేట మండలాల్లో ప్రభుత్వ జూనియర్‌ కళాశాలలు నిర్మిస్తామని గత ఎన్నికల ప్రచారంలో మంత్రులు కేటీఆర్‌, హరీశ్‌రావు, ప్రజా ప్రతినిధలు హామీలిచ్చారు. దీంతో తమ ప్రాంతంలో జూనియర్‌ కళాశాల నిర్మాణం అయితే ఎంతోమంది పేద విద్యార్థులకు ఉపయోగకరంగా ఉంటుందని ప్రజలు ఆశపడ్డారు. ఆ హామీలు నేటికి నెరవేరక పోవడంతో విద్యార్థులు, వారి తల్లిదండ్రులు ఆవేదన వ్యక్తం చేస్తున్నారు. నూతన విద్యా సంవత్సరం ఆరంభమైనా ఈ ఏడాది కూడా కళాశాలల ఏర్పాటు కలగానే మారుతోందని వాపోతున్నారు.

ఏటా వేయి మందికి పైనే...
దౌల్తాబాద్‌లో 33, బొంరాస్‌పేటలో 43గ్రామ పంచాయతీలున్నాయి. ఈ ప్రాంత విద్యార్థుల ఉన్నత చదువులకు దౌల్తాబాద్‌లో 7 ఉన్నత, ఓ కస్తూర్బా పాఠశాల, బొంరాస్‌పేటలో 4 ఉన్నత, కస్తూర్బా, ఆశ్రమ పాఠశాలలు ఉన్నాయి. వీటిలో మొత్తం కలిపి ఏటా 1000 మందికి పైగా విద్యార్థులు పది ఉత్తీర్ణులవుతున్నారు. వీరిలో బాలుర కంటే బాలికలే అధికంగా ఉంటారు. మారుమూల మండలాల్లో ప్రభుత్వ జూనియర్‌ కళాశాలలు లేకపోవడంతో విద్యార్థులు ఉన్నత విద్యకు దూరం అవుతున్నారు.

ప్రస్తుతం ఒక్కటే ఒక్కటి
విద్యార్థుల సౌకర్యార్థం కొడంగల్‌లో ప్రభుత్వ కళాశాల ఉంది. మూడు మండలాల్లో కలిసి సుమారు 1700కుపైగా విద్యార్థులుంటారు. వీరికి ఒక కశాలలో సీట్లు సరిపోక తాండూరు, పరిగి, మహబూబ్‌నగర్‌ వంటి ప్రాంతాలకు వెళ్తున్నారు. ఆర్థిక స్థోమత ఉన్న వారు ప్రైవేట్‌కు పంపుతున్నారు. స్థోమత లేని వారు ఇతర పనులకు పంపిస్తున్నారు. వీరిలో అధికంగా బాలికలే ఉంటున్నారు. వీరిలో ఎంతో ప్రతిభ ఉన్నా సౌకర్యాలు లేక ఆడపిల్లలు ఇంటికే పరిమితం అవుతున్నారని పలువురు విద్యావేత్తలు వాపోతున్నారు. ఈ సమస్యను అధిగమించడానికి పలుసార్లు విద్యార్థి సంఘాలు, తల్లిదండ్రులు నాయకులకు, అధికారులకు విన్నపాలు తెలిపినా సమస్య అలాగే మిగిలిపోయిందన్నారు.

2017లో నిర్మాణ పనులు ప్రారంభించినా..
2017 డిసెంబర్‌లో దౌల్తాబాద్‌ మండల కేంద్రంలోని పాత పోలీస్‌స్టేషన్‌ భవనాన్ని కూల్చివేసి ఆ ప్రాంతంలో జూనియర్‌ కళాశాల నిర్మాణ పనులు చేపట్టాలని భావించారు. అందుకోసం గెయిల్‌ సంస్థ సహకరించింది. అప్పటి శాసనసభ్యుడు రేవంత్‌రెడ్డి పనులను సైతం పరిశీలించి జూన్‌ వరకు భవనం నిర్మించి తరగతులు ప్రారంభించేలా చర్యలు తీసుకోవాలంటూ అధికారులను సైతం ఆదేశించారు. పనులను మధ్యలోనే నిలిపి వేశారు. కొడంగల్‌ శాసనసభ్యుడు పట్నం నరేందర్‌ రెడ్డి, మాజీ శాసనసభ్యుడు గుర్నాథ్‌రెడ్డి సైతం ఈప్రాంత సమస్యపై ముఖ్యమంత్రి కేసీఆర్‌కు విన్నవించారు. ఎలాంటి పురోగతి కనిపించడంలేదు. ఇకనైనా ప్రజాప్రతినిధులు, అధికారులు స్పందించి స్థానికంగా ఇంటర్‌ తరగతులు ప్రారంభించేలా చూడాలని తల్లిదండ్రులు కోరుతున్నారు.