ప్రాచీన జ్ఞానమే ఆధునిక విజ్ఞాన పురోగతికి ఆధారం

ఈనాడు, హైదరాబాద్‌ : భారతీయ ప్రాచీన జ్ఞానం, శాస్త్రీయ అవగాహననే ఆధునిక విజ్ఞాన పురోగతికి ఆధారమని కౌన్సిల్‌ ఆఫ్‌ సైంటిఫిక్‌ అండ్‌ ఇండస్ట్రీయల్‌ రీసెర్చ్‌ (సీఎస్‌ఐఆర్‌) మాజీ డైరెక్టర్‌ జనరల్‌, విజ్ఞాన భారతి అధ్యక్షుడు డాక్టర్‌ శేఖర్‌ సి మాండె అన్నారు. ఆజాదీ కా అమృత్‌ మహోత్సవంలో భాగంగా విజ్ఞాన భారతి, తెలంగాణ శాఖ, నగరంలో మూడు సీఎస్‌ఐఆర్‌ పరిశోధన సంస్థలు ఐఐసీటీ, సీసీఎంబీ, ఎన్‌జీఆర్‌ఐ సంయుక్తంగా శుక్రవారం ఎన్‌జీఆర్‌ఐ ప్రాంగణంలో నిర్వహించిన కార్యక్రమంలో ఆయన మాట్లాడారు. దేశ ప్రజలందరూ ఐక్యంగా ఉండి సత్యనిష్ఠ, నిస్వార్థ సేవలతో దేశాభివృద్ధికి పాటు పడాలని కోరారు. సమావేశంలో ఎన్‌జీఆర్‌ఐ డైరెక్టర్‌ డాక్టర్‌ వి.ఎం.తివారీ, సీసీఎంబీ డైరెక్టర్‌ డాక్టర్‌ వినయ్‌ నందికూరి, సీసీఎంబీ మాజీ డైరెక్టర్‌ సీహెచ్‌ మోహన్‌రావు, పలువురు శాస్త్రవేత్తలు పాల్గొన్నారు.