పిస్టల్‌తో సంచరిస్తున్న వ్యక్తి పట్టివేత

జవహర్‌నగర్‌: దేశవాళీ పిస్టల్‌తో సంచరిస్తున్న పాతనేరస్థుడిని రాచకొండ పోలీసులు అరెస్టు చేశారు. మేడ్చల్‌-మల్కాజిగిరి జిల్లా జవహర్‌నగర్‌ ఠాణా పరిధిలో చోటుచేసుకుంది. మల్కాజిగిరి ఎస్‌ఓటీ ఇన్‌స్పెక్టర్‌ అశోక్‌రెడ్డి, జవహర్‌నగర్‌ సీఐ చంద్రశేఖర్‌ తెలిపిన వివరాల ప్రకారం.. మధ్యప్రదేశ్‌కు చెందిన ప్రైవేటు ఉద్యోగి రాకేష్‌ త్యాగి(43), దమ్మాయిగూడ సిద్ధార్థనగర్‌కాలనీలో ఉంటున్నాడు. తన బావమరిది ఆశిశ్‌ త్యాగి సాయంతో నాలుగు నెలల క్రితం పిస్టల్‌ను రూ.50 వేలకు కొనుగోలు చేశాడు. శుక్రవారం పీఎస్‌రావునగర్‌ ప్రాంతంలో పిస్టల్‌తో సంచరిస్తుండగా ఎస్‌ఓటీ, జవహర్‌నగర్‌ పోలీసులు నిందితుడిని అదుపులోకి తీసుకున్నారు. నిందితుడిపై రెండు కేసులున్నాయని పోలీసులు తెలిపారు. సొంతూర్లో భూ వివాదాలున్నాయని ఆత్మరక్షణ కోసమే పిస్టల్‌ను కొనుగోలు చేశానని నిందితుడు చెప్పారు. మరో నిందితుడు పరారీలో ఉన్నట్లు పోలీసులు తెలిపారు.