ఆసరాకు అర్హులు లక్ష మందిపైనే!

ఈనాడు, హైదరాబాద్‌: ఆసరా పింఛన్ల కోసం ఏళ్లుగా ఎదురుచూస్తున్న దరఖాస్తుదారులకు తీపికబురు. ఆగస్టు 15 నుంచి, 57 ఏళ్ల వయసున్న వారికి పింఛన్లు ఇస్తామని సీఎం కేసీఆర్‌ శనివారం ప్రకటించడంతో వేలాది మంది అర్హుల్లో కొత్త ఆశలు చిగురిస్తున్నాయి. 57 ఏళ్ల వారితో పాటు వృద్ధులు, దివ్యాంగులు, వితంతు, ఒంటరి మహిళల పింఛన్లకూ ఆమోదం లభించనుంది. సీఎం తాజా నిర్ణయంతో ఆసరా కింద హైదరాబాద్‌, మేడ్చల్‌, రంగారెడ్డి జిల్లాల నుంచి 59,017 మంది ప్రయోజనం పొందనున్నారు. ఇప్పటికే వీరి దరఖాస్తుల పరిశీలన పూర్తయింది. మండల స్థాయిలో అర్హుల వివరాల్ని తనిఖీ చేసి జిల్లా అధికారులకు పంపారు. అక్కడి నుంచి రాష్ట్ర స్థాయికి పంపినా మంజూరు చేయలేదు. సీఎం ప్రకటనతో వాటికి మోక్షం లభించనుంది. పింఛను అర్హత వయసు కుదింపు నేపథ్యంలో లబ్ధిదారుల గుర్తింపు ఎలా అన్నదానిపై తర్జన భర్జన కొనసాగుతోంది. ఈ కేటగిరీ కింద గ్రేటర్‌ పరిధిలో పెద్దఎత్తున దరఖాస్తులు వచ్చాయి. 57 ఏళ్ల వయసు కేటగిరీ కింద అర్హులు కలిపితే నగరంలో కొత్తగా లక్ష మంది పింఛన్లు తీసుకునే అవకాశముందని చెబుతున్నారు.

జిల్లాలవారీగా ఆమోదం పొందిన ఆసరా దరఖాస్తులు

హైదరాబాద్‌ 25,206

రంగారెడ్డి 13,561

మేడ్చల్‌ 20,250

(ఇవన్నీ వృద్ధాప్య, దివ్యాంగ, వితంతు కేటగిరీ పింఛన్లు మాత్రమే).