మోస్తరు వాన.. రాకపోకలకు హైరానా

ఖైరతాబాద్‌లో రహదారిపై వరద ప్రవాహం.. పక్కన స్తంభించిన ట్రాఫిక్‌

ఈనాడు, హైదరాబాద్‌: నగరంలో ఆదివారం పలు ప్రాంతాల్లో తేలికపాటి నుంచి ఓ మోస్తరు వర్షం కురిసింది. మధ్యాహ్నం నుంచి రాత్రివరకు అనేక ప్రాంతాల్లో వాన పడింది. అల్పపీడన ప్రభావంతో వర్షాలు కురుస్తున్నట్లు వాతావరణ శాఖ తెలిపింది. ఉప్పల్‌, హిమాయత్‌నగర్‌, ఎల్బీనగర్‌, ఖైరతాబాద్‌, చంపాపేట, సరూర్‌నగర్‌లో మధ్యాహ్నం పూట గంటకుపైగా కురిసిన వర్షంతో లోతట్టు రహదారులపై అడుగు లోతు వరద చేరింది. ఆదివారం ఎస్సై పరీక్షకు హాజరైన అభ్యర్థులు వర్షంతో ఇబ్బంది పడ్డారు. చాంద్రాయణగుట్ట ఫ్లైఓవర్‌ పనులకు తోడు.. గుంతల రహదారులతో ఆ ప్రాంతంలో ఇరువైపులా కిలోమీటర్‌ వరకు ట్రాఫిక్‌జాం అయ్యింది. రహదారులపై ఎక్కడ చూసినా ఇసుక మేట వేయడంతో ప్రమాదకరంగా మారాయి.