వృద్ధులకు రాయితీతో వైద్యం: టీఎస్‌ఆర్టీసీ

బేగంబజార్, న్యూస్‌టుడే: వజ్రోత్సవాలను పురస్కరించుకుని 75 ఏళ్లు పైబడిన వృద్ధులకు రాయితీతో కూడిన వైద్య సేవలు అందజేస్తామని టీఎస్‌ఆర్టీసీ మేనేజింగ్‌ డైరెక్టర్‌ వి.సి.సజ్జనార్‌ వెల్లడించారు. ఈనెల 15న జన్మించే పిల్లలకు ఆర్టీసీలో 12 ఏళ్లపాటు ఉచిత ప్రయాణంతో పాటు వజ్రోత్సవాల సందర్భంగా మరిన్ని రాయితీలు ప్రకటించిన విషయం తెలిసిందే. మంగళవారం వి.సి.సజ్జనార్‌ ఎంజీబీఎస్‌ప్రాంగణంలో ప్రయాణికులతో సౌకర్యాలపై మాట్లాడారు. ఈ నెల 15 నుంచి 22వ తేదీ వరకూ తార్నాకలోని ఆర్టీసీ ఆసుపత్రిలో ఉచిత వైద్యశిబిరం నిర్వహిస్తున్నట్లు తెలిపారు.  టీఎస్‌ఆర్టీసీ అధికారులు పురుషోత్తం నాయక్, మునిశేఖర్, సోలమన్, ఓ.సుధ, సరస్వతి, విష్ణువర్ధన్‌రెడ్డి పాల్గొన్నారు.