రక్తనిధి కేంద్రంలో డ్రగ్స్‌ కంట్రోల్‌ అధికారుల తనిఖీ

నల్లకుంట, న్యూస్‌టుడే: తలసేమియా బాలుడికి హెచ్‌ఐవీ సోకిన ఘటనలో రక్తనిధి కేంద్రంలో డ్రగ్స్‌ కంట్రోల్‌ అధికారులు తనిఖీ చేశారు. బుధవారం విద్యానగర్‌లోని రెడ్‌క్రాస్‌ రక్తనిధి కేంద్రంలో ఉదయం నుంచి రాత్రి వరకు సోదాలు చేశారు. ఇటీవల కీసర ప్రాంతానికి చెందిన బాలుడి(3)కి రక్తం ఎక్కించిన తర్వాత హెచ్‌ఐవీ పాజిటివ్‌ రావడంతో అతని తండ్రి నల్లకుంట ఠాణాలో ఫిర్యాదు చేసిన విషయం తెలిసిందే. బాలునికి ఎప్పుడెప్పుడు రక్తం ఎక్కించారు.. ఎవరి నుంచి సేకరించిన రక్తం మార్పిడి చేశారు తదితర వివరాలను డ్రగ్స్‌ కంట్రోల్‌ అధికారులు అడిగి తెలుసుకున్నారు. రక్తమార్పిడి జరుగుతున్న తీరు, రోగులకు సమకూర్చిన వసతులు, దాతల నుంచి సేకరిస్తున్న రక్తం నిల్వ చేసే పద్ధతి.. వారి వివరాలు, రక్త పరీక్షల విధానం, వైద్య పరికరాలను పరిశీలించారు.